ممبئی : بھارتی اسٹیج کی معروف مزاحیہ اداکارہ بھارتی سنگھ کے گھر پر پولیس نے چھاپہ مارا اداکارہ اور ان کے شوہر سے پوچھ گچھ کی،میاں بیوی پر ممنوعہ منشیات کے استعمال کا الزام ہے۔
تفصیلات کے مطابق بھارت کے شوبز حلقوں میں ان دنوں منشیات کا استعمال دن بدن فروغ پارہا ہے جس کے سبب اہم شخصیات سمیت دیگر فنکاروں میں خود کشی کا رجحان دیکھنے میں آیا۔
اس حوالے سے آج صبح انسداد منشیات ایجنسی نارکوٹکس کنٹرول بیورو (این سی بی) کی ٹیم نے مشہور مزاحیہ اور اسٹیج اداکارہ بھارتی سنگھ اور ان کے شوہر ہرش لنباچیا کی ممبئی واقع رہائش پر چھاپہ مارا۔
اسٹیج پر مزاحیہ اداکاری کرکے سب کے لبوں پر مسکراہٹیں بکھیرنے والی بھارتی سنگھ کپل شرما کے شو کا بھی حصہ ہیں، این سی بی ذرائع کے مطابق بھارتی سنگھ اور ان کے شوہر ہرش لمباچیا پر ممنوعہ منشیات کے استعمال کا الزام ہے۔
انڈیا ٹوڈے کے مطابق اداکارہ بھارتی سنگھ کے گھر سے تھوڑی سی مقدار میں منشیات ملی ہے تاہم ابھی تک یہ معلوم نہیں ہو سکا کہ یہ منشیات ہے یا کسی ڈاکٹر نے یہ دوا تجویز کی ہے۔
محکمہ انسداد منشیات کے عملے نے یئہ کارروائی ایسے وقت میں کی ہے جب فلم اور انٹرٹینمنٹ کی صنعت میں منشیات کے مبینہ استعمال کے حوالے سے تفتیش کا دائرہ وسیع ہو رہا ہے۔ یہ تفتیش معروف بالی ووڈ اداکار سوشانت سنگھ راجپوت کی موت کے بعد شروع ہوئی تھی۔
اس کے علاوہ این سی بی نے حال ہی میں بھارتی فلمون نے اداکار ارجن رامپال کی رہائش گاہ پر بھی چھاپہ مارا اور منشیات کے سلسلہ میں ان سے طویل پوچھ گچھ کی گئی تھی۔
یاد رہے کہ فلمی اداکار سوشانت سنگھ راجپوت 14 جون کو باندرا میں واقع اپنے فلیٹ میں مردہ پائے گئے تھے، ان کے مداحوں میں ان کی موت کی وجہ سے کافی غم و غصہ پایا گیا جس کے بعد اس معاملہ کی جانچ سی بی آئی کے ہاتھ میں سونپ دی گئی۔
