بہار : بھارت میں ریپ کی کوشش کے الزام میں گرفتار شخص کو عدالت نے 6 ماہ تک اپنے گاؤں کی تمام خواتین کے کپڑے دھونے اور استری کرنے کی شرط پر ضمانت پر رہا کردیا۔
تفصیلات کے مطابق بھارت کی عدالت نے ریپ کے الزام میں قید ایک شخص کی ضمانت اس شرط پر منظور کی ہے کہ وہ گاؤں کی تمام خواتین کے کپڑے مفت دھوئے اور استری کرے گا۔
خبر رساں ادارے کی رپورٹ کے مطابق بدھ کو سنائے گئے فیصلے میں 20 سالہ لالن کمار کو ریاست بہار کے گاؤں ماجوڑ میں 6 ماہ تک خود سے ڈیٹر جنٹ اور دیگر اشیا خرید کر تقریباً 2 ہزار خواتین کے کپڑے دھونے کے ساتھ ساتھ استری بھی کر کے دینے ہوں گے۔
ریاست بہار کے ضلع مدھوبنی کے پولیس افسر سنتوش کمار سنگھ نے اے ایف پی کو بتایا کہ ملزم لالن کمار دھوبی کا کام کرتا ہے، ریپ کی کوشش کے الزام میں اسے اپریل میں گرفتار کیا گیا تھا۔
گاؤں کی کونسل کی سربراہ نسیمہ خاتون نے اے ایف پی کو بتایا کہ گاؤں کی تمام خواتین عدالتی فیصلے سے خوش ہیں۔ انہوں نے کہا کہ یہ تاریخی ہے اور اس سے خواتین کے احترام میں اضافہ ہوگا اور وقار کے تحفظ میں مدد ملے گی۔
خیال رہے کہ سال 2012 میں دہلی میں ہونے والے گینگ ریپ کے بعد حکومت نے ریپ سے متعلق قوانین میں مکمل رد و بدل کی تھی، لیکن اس کے باوجود جنسی زیادتی کے واقعات میں کمی نہیں آئی۔
سال 2020 میں دہلی میں ریپ کے 28 ہزار واقعات رپورٹ ہوئے تھے۔ پولیس پر الزام عائد کیا جاتا ہے کہ اس جرم کو روکنے کے حوالے سے خاطر خواہ اقدامات نہیں کیے گئے اور نہ ہی ملزم کو عدالت کے سامنے پیش کیا جاتا ہے۔
