The news is by your side.

Advertisement

فواد خان کو بھارتی فلم میں دوبارہ مرکزی کردار کی پیشکش

نئی دہلی : معروف بھارتی فلم ساز شیام بینیگل نے اپنی فلم کے لیے پاکستانی اداکار فواد خان کو کاسٹ کرنے کی خواہش ظاہر کردی ہے، فلم کا موضوع آرٹ اور کلچر کے ذریعے ایک دوسرے سے لڑنے والے ممالک کو قریب لانا ہے۔

تفصیلات کے مطابق شیام بینیگل کی نئی آنے والی فلم کا نام ’’یہ راستے ہیں پیار کے‘‘ ہے جو ہدایت کار ہرش نارائن ہیں جس میں فواد خان کا کردار ایک موسیقار کا ہوگا جو محبت اور اتفاق کی سُروں پر دوطرفہ تعلقات کو مضبوط بناتا ہے۔

شیام بینیگل کی جانب سے فواد خان کو نئی فلم میں کام کرنے کی پیشکش اپنی جگہ لیکن بالی ووڈ پاکستانی اداکاروں کے لیے بھیانک خواب بنتا جارہا ہے، جہاں سے حال ہی میں پاکستانی اداکاروں کو ہزیمت بھری واپسی کا سامنا رہا ہے تاہم ایسے ملک میں اور ایسے کشیدہ حالات میں شیام بینیگل کا فواد خان کو اپنی فلم میں پیشکش دلیرانہ فیصلہ ہے۔

بھارتی فلم انڈسٹری اس حوالے سے دل چسپ صورت حال پیدا ہو گئی ہے ایک طرف Central Board of Film Certification ہے جس کے سربراہ پہلاج نیہلانی نے واضح کردیا ہے کہ پاکستانی اداکاروں کو بالی ووڈ میں کام کرنے کی اجازت نہیں دی جائے گی جب کہ شیام بینیگل جو اسی ’’سی بی ایف سی‘‘ کی بہتری اور بحالی کی کمیٹی کے رکن بھی ہیں، وہ فواد خان کو اپنی فلم میں کاسٹ کرنا چاہتے ہیں۔

اس دلچسپ صورت حال کے پیدا ہونے کے بعد اب دیکھنا یہ ہے کہ بالی ووڈ شیام بینیگل کے اس فیصلے پر کیا ردعمل دیتی ہے اور خود فواد خان اس پیشکش پر کیا فیصلہ کرتے ہیں۔

واضح رہے لائن آف کنٹرول ہر کشیدگی کے بعد بھارتی انتہا پسندوں کی جانب سے پاکستانی اداکاروں کو بھارت چھوڑنے کی دھمکی دی گئی تھی جب کہ بھارتی حکومت بھی پاکستانی اداکاروں کو تحفظ فراہم کرنے سے قاصر رہی جس کے بعد پاکستانی اداکار وطن واپس لوٹ آئے تھے۔

پاکستانی اداکاروں کی وطن واپسی کے بعد بھی نفرت کی آگ بجھی نہیں جس کے بعد بھارتی انتہا پسندی کی جانب سے پاکستانی اداکاروں کی بھارت میں بننے اور ریلیز ہونے والی فلموں پر بھی پابندی عائد کردی گئی تھی۔

 

Comments

comments

یہ بھی پڑھیں