راولپنڈی : بھارتی فوج کی جانب سے شکر گڑھ سیکٹر پر بلااشتعال فائرنگ کی گئی، پاکستان رینجرز نے مؤثر جواب دیتے ہوئے دشمن کی توپیں خاموش کرادیں۔
پاکستان کی جانب سے تعلقات کی بحالی اور خیر سگالی کی کوشش کے باوجود بھارت اشتعال انگیزی سے باز نہ آیا ، بھارتی فوج نے جنگ بندی کے معاہدے کی خلاف ورزی کرتے ہوئے ایک بار پھر کنٹرول لائن پر فائرنگ شروع کردی۔
آئی ایس پی آر کے مطابق بھارتی افواج نے شکر گڑھ سیکٹر پر بلا اشتعال فائرنگ شروع کردی، جس کے جواب میں پاکستان رینجرز نے بھرپور جواب دیتے ہوئے بھارتی بندوقیں خاموش کرادیں، بھارتی فوج نے ورکنگ باؤنڈر پر چک امرو گاؤں میں شیلنگ کی، فائرنگ کا تبادلہ نو سے ساڑھے نو بجے کے درمیان ہوا۔
گزشتہ روز پاکستان نے سیز فائر کی خلاف ورزی پربھارتی ڈپٹی ہائی کمشنر کو طلب کر کے شدید احتجاج کیا، بھارتی ڈپٹی ہائی کمشنر کو کرالہ سیکٹر میں خلاف ورزی پرطلب کیا گیا تھا۔
دفترخارجہ نے کہا کہ بھارت کی سیزفائرکی خلاف ورزی پراقوام متحدہ کو درخواست دی ہے، اقوام متحدہ سے کہا ہے سیزفائرکی خلاف ورزی کی تحقیقات کرائی جائے۔
یاد رہے دو روز قبل بھی بھارتی فوج کی جانب سے نکیال سیکٹر سمیت مختلف علاقوں پر بلااشتعال فائرنگ سے 1 شہری شہید دو بچوں سمیت 5 افراد زخمی ہوئے تھے۔
مزید پڑھیں : بھارتی فوج کی نکیال سیکٹر پر فائرنگ، 1 شہری شہید 2 بچوں سمیت 5 زخمی
واضح رہے کہ اڑی حملے کے بعد سے پاک بھارت تعلقات میں کشیدگی برقرار ہے ، اڑی حملے میں 18 بھارتی فوجی ہلاک ہوگئے تھے۔
