ممبئی: بھارت میں گھر والوں کی غفلت سے جواں سال لڑکی جھلس کر ہلاک ہوگئی، والدین بیٹی کو کمرے میں بند کرکے شادی میں شرکت کے لیے چلے گئے، آگ لگنے کے بعد لاک نہ کھل سکا۔
تفصیلات کے مطابق ممبئی میں گھر والوں کی غفلت سے جوانسال لڑکی ہلاک ہوگئی، بھارتی ٹی وی کا کہنا ہے کہ ایک ہولناک واقعہ گذشتہ روز بھارتی شہر ممبئی میں واقع سبربن داداڑ کے پولیس اسٹیشن کمپاونڈ میں پیش آیا جہاں 16 سالہ شراوانی چون کی آگ لگنے سے مو ت واقع ہوگئی۔
شراوانی چون اپنے کمرے میں سو رہی تھی جبکہ اس کے گھر والے سمجھے کے شراوانی اپنے کمرے میں پڑھ رہی ہے اور اس کو باہر جانے کی ضرورت نہیں پڑے گی، شراوانی کی فیملی نے شراوانی کے کمرے سمیت گھر کو لاک کیا اور ایک شادی میں شرکت کے لیے چلے گئے۔
فائر بریگیڈ کے مطابق آگ 1بج کر 45 منٹ پر بھڑکی اور داداڑ پولیس اسٹیشن کمپاونڈ میں موجود 5 منزلہ عمارت کی تیسری منزل کو اپنی لپیٹ میں لے لیا، فائر بریگیڈ کے نمائندے نے تفصیلات بتاتے ہوئے انکشاف کیا کے شراوانی کا کمرہ اند سے لاک تھا جبکہ کمرے سے مٹی کے تیل کی ایک خالی بوتل بھی برآمد ہوئی ہے۔
فائر بریگیڈ کے نمائندے نے مزید بتایا کہ شراوانی کو مقامی اسپتال لے جایاگیا مگر وہ آگ سے بری طرح سے جھلس چکی تھیں، ڈاکٹرز نے شراوانی کو داخل کرنے سے منع کر دیا اور ان کی موت کی تصدیق کی۔
شراوانی کے والد وکولا پولیس اسٹیشن میں نائک پولیس تعینات ہیں۔ پولیس کا کہنا تھا کہ اس حادثے میں کافی نقصان ہوا ہے اور شبہ ہے کہ اپارٹمنٹ میں نصب ایئر کنڈیشنڈ میں شارٹ سرکٹ کے نتیجے میں آگ لگی جس نے سارے اپارٹمنٹ کو اپنی لپیٹ میں لے لیا۔
معاملے کی مزید تفتیش جاری ہے اور اپارٹمنٹ سے بر آمد ہونے والی مٹی کے تیل کی بوتل کی بھی تفتیش کی جارہی ہے۔
