site
stats
پاکستان

پاکستانی شہری سے شادی: بھارتی خاتون انڈین ہائی کمیشن میں محصور

اسلام آباد: پاکستانی شہری سے شادی کرنے والی بھارتی خاتون کو انڈین ہائی کمیشن نے عمارت میں ہی محصور کردیا، بونیر کا شہری بیوی کے حصول کے لیے اسلام آباد پولیس کے پاس پہنچ گیا۔

تفصیلات کے مطابق بھارتی شہری ڈاکٹر عظمیٰ نے پاکستانی شہری بونیر کے رہائشی طاہر علی سے شادی کی ، وہ اپنے شوہرکا ویزا لگوانے کے لیے اسلام آباد میں واقع بھارتی ہائی کمیشن گئیں جہاں بھارتی حکام نے انہیں ہائی کمیشن میں ہی روک لیا اور وہ تاحال واپس نہ آسکیں۔

ڈاکٹر عظمیٰ بھارتی شہری اور نئی دہلی کی رہائشی ہیں وہ واہگہ بارڈر کے ذریعے پاکستان آئیں اور انہوں نے 3 مئی کو بونیر کے رہائشی طاہر نامی شخص سے نکاح کیا جس  کے بعد وہ اپنے شوہر کے بھارتی ویزے کے لیے بھارتی ہائی کمیشن گئیں جہاں سے وہ واپس نہ آئیں۔

بھارتی ہائی کمیشن کا ڈاکٹر عظمیٰ کی موجودگی سے انکار

دوسری جانب بھارتی ہائی کمیشن نے ڈاکٹر عظمیٰ کی موجودگی سے ہی انکار کردیا جس کے جواب میں ان کے شوہر طاہر علی نے بھارتی ہائی کمیشن کے خلاف تھانہ سیکریٹریٹ میں درخواست جمع کرادی۔

بھارتی ہائی کمیشن سے رابطے میں ہیں، دفتر خارجہ پاکستان

دفتر خارجہ پاکستان نے کہا ہے کہ وہ ڈاکٹر عظمیٰ سے متعلق بھارتی ہائی کمیشن سے رابطے میں ہیں، ڈاکٹر عظمیٰ سے متعلق پیر کو پیش رفت کا امکان ہے۔

ڈاکٹر عظمیٰ ہائی کمیشن میں ہیں، پولیس

پولیس حکام کا کہنا ہے کہ  بھارتی ہائی کمیشن سے رابطہ ہوا ہے، بھارتی ہائی کمیشن نے تصدیق کی ہے کہ ڈاکٹر عظمیٰ ان  کے پاس ہیں۔

پولیس کے مطابق بھارتی ہائی کمیشن کا کہنا ہے کہ مزید بات چیت دفتر خارجہ کے ذریعے ہوگی۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top