سنہرے مستقبل کے خواب سجائے آسٹریلوی دورے پر موجود بھارتی فاسٹ بولر محمد سراج کو والد کی جدائی کے صدمے نے غمگین کر دیا۔
آسٹریلیا کے خلاف ٹیسٹ اسکواڈ کا حصہ بننے والے محمد سراج کے والد 53 سال کی عمر میں جہانِ فانی سے کوچ کر گئے۔
محمد غوث پھیپھڑوں کی بیماری سے لڑتے ہوئے آخرکار جنگ ہار گئے اور خالقِ حقیقی سے جاملے۔ 14 روزہ قرنطینہ میں موجود فاسٹ بولر نے والد کی آخری رسومات کے لیے وطن واپس نہ آنے کا فیصلہ کیا ہے۔
13نومبر کو آسٹریلیا پہنچنے والی بھارتی ٹیم 14 روزہ قرنطینہ کی آدھی مدت گزار چکی ہے اور قرنطینہ مکمل کرنے کے بعد کوویڈ پوروٹو کولز پورا کرنے والے کھلاڑیوں کو کلیئر قرار دیا جائے گا۔
26سالہ محمد سراج ٹیسٹ اسکواڈ میں پانچویں فاسٹ بولر کی حیثیت سے موجود ہیں وہ اب تک ایک ون ڈے اور 3 ٹی ٹوئنٹی میچز کھیل چکے ہیں۔
واضح رہے کہ پاکستان کے ابھرتے ہوئے اسٹار فاسٹ بولر نسیم شاہ کے دورہ آسٹریلیا کے دوران والدہ کا انتقال ہوگیا تھا اور انہوں نے بھی دورہ ادھورا چھوڑ کر وطن نہ لوٹنے کا فیصلہ کیا تھا۔
