مودی کا نواز شریف کو تعزیتی خط، کلثوم نواز کے انتقال پر دکھ کا اظہار -
The news is by your side.

Advertisement

مودی کا نواز شریف کو تعزیتی خط، کلثوم نواز کے انتقال پر دکھ کا اظہار

نئی دہلی: بھارتی وزیرِ اعظم نریندر مودی نے جیل میں قید سابق وزیرِ اعظم نواز شریف کو ان کی اہلیہ کلثوم نواز کے انتقال پر تعزیتی خط لکھ دیا۔

تفصیلات کے مطابق نریندر مودی نے نواز شریف کو خط لکھتے ہوئے اپنے گہرے غم کا اظہار کیا، انھوں نے لکھا ’مجھے بیگم صاحبہ کے انتقال پر بے حد دکھ ہوا ہے۔‘

پاکستان مسلم لیگ (ن) کے رہنما نواز شریف کو مخاطب کرتے ہوئے مودی نے خط میں مزید لکھا ’میں عظیم ربّ سے دعا کرتا ہوں کہ وہ بیگم صاحبہ کو ابدی سکون عطا کرے، اور آپ کو اور دیگر سوگواران کو اس ناقابلِ تلافی نقصان کو برداشت کرنے کا حوصلہ بخشے۔‘

بھارتی وزیرِ اعظم نریندر مودی کا کہنا تھا کہ وہ بیگم کلثوم نواز کے ساتھ ملاقات کی خوش گوار یادوں کو ہمیشہ یاد کرتے رہیں گے۔

دریں اثنا بھارتی وزیرِ خارجہ سشما سوراج نے بھی سماجی رابطوں کی ویب سائٹ ٹویٹر پر شریف خاندان سے گہرے غم اور دکھ کے ساتھ اظہارِ تعزیت کیا۔

سشما سوراج نے لکھا کہ ’مجھے محترمہ کلثوم نواز کے انتقال کی خبر سن کر بے حد صدمہ ہوا، میں سوگوار خاندان سے اظہارِ تعزیت کرتی ہوں، اوپر والا ان کی روح کو سکون و قرار عطا کرے۔‘


مزید پڑھیں:  شریف خاندان کی پیرول پر رہائی میں 3 دن کی توسیع


واضح رہے کہ بیگم کلثوم نواز کی تدفین کے سلسلے میں سابق وزیرِ اعظم نواز شریف، ان کی صاحب زادی مریم نواز اور داماد کیپٹن صفدر کو پیرول پر 3 دن کے لیے رہا کیا گیا ہے۔

خیال رہے کہ سابق خاتونِ اول بیگم کلثوم نواز طویل علالت کے بعد گزشتہ روز لندن میں انتقال کر گئی ہیں، سابق وزیرِ اعلیٰ پنجاب شہباز شریف اپنی بھابھی کی میت لینے کے لیے لندن روانہ ہوچکے ہیں، وہ میت لے کر جمعہ کو وطن واپس آئیں گے جس کے بعد مرحومہ کلثوم نواز کو جاتی امرا میں سپرد خاک کیا جائے گا۔

Comments

comments

یہ بھی پڑھیں