The news is by your side.

بھارت: دہلی کا رابن ہڈ گرفتار

نئی دہلی: پولیس کی ناک میں دم کرنے والا دہلی کا رابن ہڈ گرفتار ہو گیا۔

تفصیلات کے مطابق بھارت میں دہلی پولیس نے رابن ہڈ کہلانے والے شخص کو گرفتار کر لیا، 27 سالہ وسیم اکرم نے امیروں کا مال لوٹ کر غریبوں میں بانٹنے کی وارداتوں سے بہت شہرت حاصل کر لی تھی۔

دہلی پولیس کا کہنا ہے کہ رابن ہڈ وسیم اکرم امیر افراد کو لوٹ کر چوری کا کچھ حصہ غریبوں میں بانٹ دیتا تھا، وسیم 25 افراد کے گینگ کا سرغنہ ہے، تاہم یہ بھی بتایا جا رہا ہے کہ یہ گینگ شوخ و چنچل افراد پر مشتمل ہے۔

بھارتی میڈیا کے مطابق انڈین رابن ہڈ وسیم کو غریبوں کی مدد کی وجہ سے مقامی شہریوں کی حمایت حاصل تھی، جو اسے پولیس کی نقل و حرکت سے آگاہ کرتے تھے، اور وہ ہمیشہ فرار ہونے میں کامیاب ہو جاتا تھا۔

دہلی پولیس کا دعویٰ ہے کہ وسیم اکرم اور اس کے گینگ نے امیر گھروں کو لوٹا، نقدی اور زیورات چوری کیے اور غریبوں کو اس میں سے بس کچھ رقم دی، اور زیادہ تر مال اپنے پاس ہی رکھا۔

پولیس فورس نے دعویٰ کیا ہے کہ اکرم، جسے لمبو کے نام سے بھی جانا جاتا ہے، نے 160 جرائم کیے ہیں، جن میں قتل اور عصمت دری کی کوشش بھی شامل ہے۔

دہلی پولیس کے مطابق رابن ہڈ کو پکڑنے کے لیے ایک خصوصی سیل قائم کیا گیا تھا، جس نے 4 ماہ کی کوششوں کے بعد بالآخر جمعہ کو اسے پکڑ لیا، اس پر جون میں گرفتاری کی کوشش کے دوران فائرنگ کرنے کا الزام بھی ہے۔

Comments

یہ بھی پڑھیں