بھارت کے کالج میں طلبا کو پاکستان زندہ باد کے نعرے لگانے پر پولیس نے گرفتار کرلیا۔
بھارتی میڈیا رپورٹس کے مطابق ریاست بنگلورو کے ہوریزون کالج آف انجینئرنگ کے طلبا کی ویڈیو وائرل ہوئی تھی جس میں وہ پاکستان زندہ باد کے نعرے لگا رہے تھے، طلبا کو کالج انتظامیہ کی جانب سے معطل کردیا گیا۔
کالج انتظامیہ کی جانب سے تینوں طلبا کے والدین کو بلا کر بتایا کہ انہیں کالج سے نکال دیا گیا ہے۔
بھارتی میڈیا کا بتانا ہے کہ کالج میں ایک فیسٹیول کی تیاریاں جاری تھیں اس دوران اریان، دیناکار اور ریا نامی طلبا نے پاکستان زندہ باد کے نعرے لگائے۔
ڈپٹی کمشنر آف پولیس کا کہنا ہے کہ ’طلبا کے دوستوں نے ویڈیو ریکارڈ کرکے سوشل میڈیا پر شیئر کی۔
انہوں نے بتایا کہ کالج انتظامیہ کی جانب سے طلبا کی شکایت درج کروائی گئی تھی جس کے بعد طلبا کو گرفتار کیا گیا لیکن بعدازاں انہیں ضمانت پر رہا کردیا گیا ہے۔
پولیس کا کہنا ہے کہ ان طلبا نے مذاق میں نعرے لگائے تھے انہیں رہا کر دیا گیا ہے اور تفتیش میں تعاون کرنے کا کہا گیا ہے۔ طلبا پر ہنگامے کروانے کے لیے اشتعال انگیزی اور خوف پھیلانے کی دفعات کے تحت مقدمہ درج کیا گیا تھا۔
