سری نگر : بھارتی فورسز کی مقبوضہ وادی کے ضلع کپواڑہ میں سرچ آپریشن کے دوران فائرنگ کرکے ایک کشمیری نوجوان کو شہید کردیا۔
تفصیلات کے مطابق مقبوضہ کشمیر میں بھارت کی ریاستی دہشت گردی کا سلسلہ رکنے کا نام نہیں لے رہا، کشمیری خواتین و مردوں پر ہر گزرتے دن کے ساتھ بھارت کے بڑھتے ہوئے مظالم برداشت کررہے ہیں۔
کشمیری میڈیا سروس کا کہنا ہے کہ بھارتی فورسز نے مقبوضہ وادی کے ضلع کپواڑہ کے علاقے ہند واڑہ کا محاصرہ کرکے گھر گھر نام نہاد آپریشن کے نام پر مزید 1 کشمیری کو شہید کر دیا۔
کشمیری میڈیا کا کہنا ہے کہ مقبوضہ وادی میں قابض ظالم بھارتی فوج کی جانب سے سوپور سمیت کئی علاقوں میں پابندیاں عائد کرکے کرفیو نافذ کردیا گیا ہے، جبکہ متاثرہ علاقوں میں تعلیمی ادارے، انٹرنیٹ اور موبائل فون سروس بھی بند کردی گئی ہے۔
کشمیری خبر رساں ادارے کا کہنا تھا کہ بھارتی فورسز کی ریاستی دہشت گردی کی زد میں آکر رواں برس اکتوبر میں 39 کشمیری شہری شہید ہوئے ہیں۔
مزید پڑھیں : سری نگر: بڈگام میں بھارتی فورسز کی فائرنگ، 2 کشمیری نوجوان شہید
یاد رہے کہ 21 اکتوبر کو بھارتی فورسز نے دہشت گردانہ کارروائیوں اور ظلم و بربریت کے نتیجے میں وادی کشمیر میں 5 ماہ حاملہ خاتون شہید ہوئی تھی۔
مزید پڑھیں : مقبوضہ کشمیر میں بھارتی فوج کی فائرنگ‘ 2 کشمیری شہید
خیال رہے کہ کچھ روز قبل قابض بھارتی فورسز نے مقبوضہ کشمیر کے علاقے سری نگر میں فائرنگ کرکے 2 کشمیریوں کو شہید کردیا۔
واضح رہے کہ مقبوضہ کشمیر میں بھارتی فوج آزادی کی آواز کو دبانے کے لیے مختلف ہتھکنڈے استعمال کررہی ہے اور اب تک ہزاروں کشمیری شہید اور زخمی ہوچکے ہیں۔
