بھارت کی ایئرلائن انڈیگو کا مسافر طیارہ بڑے حادثے سے بال بال بچ گیا۔
بھارتی میڈیا رپورٹ کے مطابق وارانسی ایئرپورٹ پر گورکھپور سے بنگلورو جانے والی پرواز کے طیارے کو پرندہ ٹکرانے کی وجہ سے ایمرجنسی لینڈنگ کرنا پڑی۔
طیارے کے اڑان بھرنے کے 15 منٹ بعد جونپور کے پاس 16 ہزار فٹ کی بلندی پر پرندہ ٹکرایا جبکہ اس میں 216 مسافر سوار تھے۔
پرندہ ٹکرانے کی وجہ سے طیارے کے اگلے حصے کو نقصان پہنچا ہے۔
پائلٹ نے اے ٹی سی سے فوری طور پر رابطہ کیا اور اسے باحفاظت وارانسی ایئرپورٹ پر ایمرجنسی لینڈنگ کروائی گئی۔
واقعے کے بعد انڈیگو نے پرواز منسوخ کردی اور مسافروں کے ٹھہرنے کے لیے وارانسی شہر کے مختلف ہوٹلوں میں انتظام کیا گیا۔
رپورٹ کے مطابق انڈیگو کی تکنیکی ٹیم طیارے کو پہنچنے والے نقصان کی جانچ کررہی ہے۔
ایئرلائن انتظامیہ کا کہنا ہے کہ مسافروں کی حفاظت ہماری اولین ترجیح ہے اور اس معاملے کی تحقیقات کی جارہی ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں