جکارتہ : انڈونیشیا میں کورونا کی بھارتی قسم نے تباہی مچادی ہے ، جکارتا میں اسپتال بھر گئے اورمریض طبی امداد کا انتظار کرتے ہوئے دم توڑنے لگے ہیں۔
تفصیلات کے مطابق انڈونیشیا میں کورونا کی بھارتی قسم قہر ڈھانے لگی، دارالحکومت جکارتا میں اسپتال بھرگئے اور بستر کم پڑگئے ، جس کے باعث مریض طبی امداد کا انتظار کرتے ہوئے دم توڑنے لگے۔
انڈونیشیا میں ڈیلٹا وائرس کے بیس ہزار سے زیادہ یومیہ کیسز رپورٹ ہورہے ہیں اور اسپتالوں میں آکسیجن کی قلت بھی بڑھ گئی ہے ، وزیر صحت کا کہنا ہے زیادہ سے زیادہ افراد کو ویکسین لگانے کی کوشش کر رہے ہیں۔
خیال رہے انڈونیشیا میں وبا کے آغاز سے لے کر اب تک کرونا وائرس سے 58 ہزار 24 افراد ہلاک ہو چکے ہیں، مجموعی کیسز کی تعداد بڑھ کر 21 لاکھ 56 ہزار ہو چکی ہے، جب کہ پیر کو اس وبا سے مزید 463 افراد ہلاک ہوئے، اور 20 ہزار 467 نئے کیسز سامنے آئے۔
وائرس سے ہیلتھ ورکرز بھی بہت زیادہ تعداد میں متاثر ہونے لگے ہیں، اور اب تک 405 ڈاکٹرز اور سیکڑوں ہیلتھ کیئر ورکرز ہلاک ہوئے ہیں، کیسز میں اضافے کی وجہ سے اسپتالوں اور کمیونٹی ہیلتھ سینٹرز پر مریضوں کا بوجھ بھی بڑھتا جا رہا ہے۔
خیال رہے محکمہ صحت کے حکام نے مئی کے بعد سے کیسز میں اضافے کا خدشہ ظاہر کیا تھا۔
