بالی: انڈونیشیا نے کابل میں اپنا سفارت خانہ دوبارہ کھولنے کا فیصلہ کر لیا۔
تفصیلات کے مطابق انڈونیشیا نے فیصلہ کیا ہے کہ افغانستان میں اپنا سفارت خانہ دوبارہ کھولا جائے گا، تاہم وزارت خارجہ نے کہا ہے کہ اس اقدام کا مطلب امارت اسلامیہ کو باضابطہ تسلیم کرنا نہیں ہے۔
انڈونیشیا کی وزارت خارجہ کے ڈی جی عبدالقادر جیلانی نے ایک بیان میں کہا کہ افغانستان میں جامع حکومت کی تشکیل کے لیے امارت اسلامیہ کے عزم کا جائزہ لیا جا رہا ہے۔
عبدالقادر جیلانی کا یہ بھی کہنا تھا کہ انڈونیشیا افغانستان میں انسانی حقوق کی پاسداری، اور انسدادِ دہشت گردی کے عزم کا بھی جائزہ لے رہا ہے۔
واضح رہے کہ حال ہی میں افغانستان کا میوزیم طالبان کی سیکیورٹی کے ساتھ دوبارہ کھل گیا ہے، طالبان، جو اگست میں برسراقتدار آئے تھے، نے افغانستان کے قومی عجائب گھر کو دوبارہ کھولنے کی اجازت دی ہے، جس میں ملکی تاریخ کی نمائش کی گئی ہے۔
یاد رہے کہ ماضی میں طالبان نے ملک کے اس قومی ورثے کو تباہ کر کے ناقابل تلافی نقصان پہنچایا تھا۔ فی الحال تقریباً پچاس سے سو افراد روزانہ اس میوزیم کا دورہ کر رہے ہیں، جن میں سے کچھ طالبان کے ارکان بھی شامل ہیں۔
