اندور: بھارتی ریاست مدھیہ پردیش میں ایک اسپتال کی لفٹ اس وقت اچانک گر گئی جب اس کے اندر ایک سابق وزیر اعلیٰ بھی موجود تھے۔
تفصیلات کے مطابق مدھیہ پردیش کے صنعتی شہر اندور میں سابق وزیر اعلیٰ کمل ناتھ پر اچانک لفٹ گر گئی، تاہم وہ ان کی جان محفوظ رہی۔
سابق وزیر اعلیٰ کانگریس کے ایک سابق وزیر کی تیمار داری کے لیے اسپتال پہنچے تھے، وہ جیسے ہی اسپتال کی لفٹ میں سوار ہوئے لفٹ گرگئی، تاہم کوئی جانی نقصان نہیں ہوا۔
اندور کے سینئر رہنما اور سابق وزیر رام شنکر پٹیل علیل ہونے کے باعث ڈی این ایس اسپتال میں زیر علاج ہیں، ان کی عیادت کے لیے سابق وزیر اعلیٰ کمل ناتھ، رکن اسمبلی جیتو پٹواری، سجن سنگھ ورما اور وشال پٹیل کے ہمراہ اسپتال گئے۔
رپورٹس کے مطابق سابق وزیر اعلیٰ جیسے ہی اپنے وزرا کے ساتھ لفٹ میں سوار ہوئے، یکایک لفٹ 10 سے 12 فٹ نیچے گر گئی، اس حادثے کے بعد اسپتال میں افراتفری کی مچ گئی۔
انتظامیہ کی جانب سے فوری طور پر حفاظتی اقدامات کیے گئے اور لفٹ انجینئر کو بلایا گیا، جب لفٹ کو کھولا گیا تو سبھی سوار بہ حفاظت باہر آئے۔
کانگریس کے صوبائی ترجمان نے ایک بیان میں سخت تنقید کرتے ہوئے کہا کہ حزب اختلاف کے رہنما اور سابق وزیر اعلیٰ کمل ناتھ کی حفاظتی اقدامات میں لاپروائی برتی گئی، اس معاملے کی جانچ کرائی جائے۔