لاہور: صوبہ پنجاب کے دارالحکومت لاہور میں 8 ماہ کا بچہ ڈینگی وائرس کے باعث زندگی کی بازی ہار گیا، صوبے میں ڈینگی وائرس کی صورتحال تشویش ناک ہوچکی ہے۔
تفصیلات کے مطابق لاہور کے چلڈرن اسپتال میں 8 ماہ کا بچہ ڈینگی کے باعث انتقال کر گیا، اسپتال انتظامیہ کا کہنا ہے کہ گزشتہ روز مذکورہ بچے موسیٰ اسد کی ڈینگی رپورٹ مثبت آئی تھی۔
انتظامیہ کا کہنا ہے کہ تشخیص کے 2 دن بعد ہی 8 ماہ کے بچے کی موت ہوگئی۔ مذکورہ بچہ لاہور میں ڈینگی سے انتقال کرنے والا پہلا بچہ ہے۔
یاد رہے کہ صوبہ پنجاب میں ڈینگی وائرس کی صورتحال بدترین ہوچکی ہے، ڈینگی کے مریضوں میں اضافے کے بعد لاہور کے 3 بڑے اسپتالوں میں بیڈز ملنا بند ہوگئے، سرکاری اسپتالوں میں ایک بیڈ پر 3، 3 مریضوں کا علاج جاری ہے۔
گزشتہ 24 گھنٹے کے دوران پنجاب میں ڈینگی کے مزید 3 مریض انتقال کرگئے اور 445 نئے کیسز رپورٹ ہوئے، لاہور سے 345، راولپنڈی سے 33، گوجرانوالہ سے 16، شیخو پورہ اور فیصل آباد سے 8، 8 کیسز سامنے آئے۔
رواں سال اب تک پنجاب میں ڈینگی کے باعث 48 افراد جان کی بازی ہار چکے ہیں۔
