اسلام آباد: جولائی کا تیسرے ہفتہ میں مہنگائی کی شرح میں 0.25 فیصد اضافہ دیکھا گیا۔
رواں مالی سال کے پہلے ماہ، جولائی 2016 کے تیسرے ہفتے کے دوران مہنگائی کی شرح میں 0.25 فیصد اضافہ ریکارڈ کیا گیا۔ کم آمدنی والے طبقے کے لیے قیمتوں کے حساس اشاریے میں 0.37 فیصد اضافہ دیکھنے میں آیا۔
پاکستان بیورو شماریات کے اعداد و شمار کے مطابق 22 جولائی کو ختم ہونے والے ہفتے کے دوران گندم، آٹا، دال ماش، چنے کی دال، ٹماٹر، لہسن، آلو، چینی، گڑ، مٹن، انڈے، دہی، سرخ مرچ اور باسمتی چاول سمیت 16 اشیائے ضروریہ کی قیمتوں میں اضافہ ہوا۔ زندہ مرغی، کیلے، ایل پی جی، دال مسور، دال مونگ، پیاز، ویجی ٹیبل گھی، سمیت 7 اشیائے ضروریہ کی قیمتوں میں کمی ریکارڈ کی گئی۔
ادارہ شماریات کے مطابق پیٹرول، ڈیزل، مٹی کا تیل، بجلی کے نرخ، گیس نرخ، چائے، کپڑے، ملک پاؤڈر، خوردنی تیل، مسٹرڈ آئل، بیف، نمک، اری چاول، تازہ دودھ، اور کھلا گھی سمیت 30 اشیا کی قیمتوں میں استحکام رہا۔
جاری کیے جانے والے اعداد و شمار کے مطابق گزشتہ ہفتہ کے مقابلے میں 8 ہزار تا 12 ہزار آمدنی، 12 ہزار تا 18 ہزار آمدنی، 18 ہزار تا 35 ہزار تک اور 35 ہزار روپے سے زائد آمدنی والے افراد کے گروہوں کے لیے قیمتوں کے حساس اعشاریے میں بالترتیب 0.32، 0.30، 0.25، 0.18 فیصد اضافہ ریکارڈ کیا گیا۔
