کراچی میں 26 جولائی سے شروع ہونے والے انٹر کے سالانہ امتحانات شیڈول کے مطابق ہوں گے۔
اے آر وائی نیوز کے مطابق چیئرمین اعلیٰ ثانوی تعلیمی بورڈ پروفیسر ڈاکٹر سعید الدین کا کہنا ہے کہ انٹر کے فوری بعد انٹرسال اول کے امتحانات بھی شیڈول کے مطابق ہوں گے، انٹر کے امتحانات کی تمام تیاریاں مکمل ہوچکی ہیں۔
چیئرمین اعلیٰ ثانوی تعلیمی بورڈ کا کہنا ہے کہ ایڈمٹ کارڈ اور ڈیٹ شیٹ کا اجرا پہلے ہی مکمل ہوچکا ہے، محکمہ تعلیم اور حکومت سندھ کے فیصلے پر عمل کیا جائے گا۔
پروفیسر سعید الدین نے کہا کہ امیدوار امتحانات سے متعلق کسی ابہام کا شکار نہ ہوں، دوران امتحانات ایس او پیز پر مکمل عمل درآمد کیا جائے گا۔
چیئرمین بورڈ نے بتایا کہ بورڈ کے عملے اور اساتذہ کی ویکسینیشن پہلے ہی مکمل ہوچکی ہے۔
واضح رہے کہ انٹر کے امتحانات کا آغاز 26 جولائی بروز منگل سے ہوگا، اساتذہ اور طلبا و طالبات کو کورونا ایس او پیز پر عملدرآمد کی ہدایت کی گئی ہے۔
