تازہ ترین

کرونا وائرس سے نمٹنے کے لیے وزیر اعظم نے بین الوزارتی کمیٹی تشکیل دے دی

اسلام آباد: وزیر اعظم عمران خان نے کرونا وائرس سے نمٹنے کے لیے بین الوزارتی 15 رکنی کمیٹی تشکیل دے دی۔

تفصیلات کے مطابق پاکستان سمیت دنیا بھر میں کروناوائرس نے خطرے کی گھنٹیاں بجا دی ہیں، پاکستان میں کرونا وائرس سے کیسے نمٹا جائے، اس سلسلے میں مختلف وزارتوں کے درمیان 15 رکنی کمیٹی تشکیل دی گئی ہے جو ایک ہفتے میں سفارشات تیار کرے گی۔

خیال رہے کہ چین کے شہر ووہان میں 2 ہزار پاکستانی طلبہ پھنس گئے ہیں، راستوں اور رابطوں کی بندش کے سبب غذائی قلت کا سامنا ہے، 12 جامعات میں زیر تعلیم سیکڑوں طلبہ نے حکومت سے وطن واپسی میں مدد کی اپیل کر دی ہے۔

شاہ محمود قریشی کا کرونا وائرس سے متعلق اہم بیان

اس سلسلے میں وزیر خارجہ شاہ محمود قریشی نے کہا ہے کہ گھبرانا نہیں، طلبہ کسی بھی معلومات کے لیے سفارت خانے سے رابطہ کر سکتے ہیں۔ انھوں نے بتایا کہ چینی وزارت خارجہ کے ساتھ بیجنگ سے مسلسل رابطے میں ہیں، ووہان میں 500 کے قریب رجسٹرڈ طلبہ ہیں، نان رجسٹرڈ کو شامل کر کے تعداد 800 کے درمیان بنتی ہے، اطلاعات کے مطابق کوئی پاکستانی وائرس سے متاثر نہیں ہے۔

وزیر خارجہ نے کہا کہ نان رجسٹرڈ طلبہ کی رجسٹریشن کے لیے 2 افسران مامور کر دیے گئے ہیں، ان کے نمبرز بھی سفارت خانے کی ویب سائٹ پر مشتہر کر دیے گئے، طلبہ رجسٹریشن یا کسی بھی معلومات کے لیے سفارت خانے سے رابطہ کر سکتے ہیں۔

Comments

- Advertisement -