مختصر دورانیے کی ٹی 20 کرکٹ اصل شہرت اس میں لگائے جانے والے بلند وبالا چھکے ہوتے ہیں لیکن بھارت میں پہلی بار کوئی ٹی 20 میچ بغیر چھکے لگائے کھیلا گیا۔
بھارت اور نیوزی لینڈ کے خلاف جاری مختصر دورانیے کی سیریز کے دوسرے ٹی 20 انٹرنیشنل میں یہ انہوںی ہوئی جس میں دونوں ٹیموں میں بڑے بڑے جارح مزاج بلے باز شامل ہونے کے باوجود کوئی بیٹر اپنے بلے کے زور پر ہوا میں گیند بلند کرکے اس باؤنڈری کے پار نہ پہنچا سکا۔
بھارت کی فتح کے ساتھ ختم ہونے والا یہ ایک لو اسکورنگ میچ تھا جس میں 39.5 اوورز کا کھیل ہوا اور دونوں ٹیموں کی جانب سے مجموعی طور پر 200 رنز اسکور کیے گئے۔ جب کہ مجموعی طور پر 12 وکٹیں گریں۔
مہمان کیوی ٹیم نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر صرف 99 رنز بنا کر مخالف ٹیم بھارت کو سنچری بنانے کا ہدف دیا تھا۔
بھارت کے لیے 100 رنز کا ہدف حاصل کرنا بھی مشکل ہوگیا تھا۔ میزبان ٹیم کی ہدف کے حصول میں وکٹیں تو صرف چار ہی گری تھیں لیکن 19.5 اوورز کھیل کر ہدف حاصل کیا تھا۔
نیوزی لینڈ کے بلے باز پوری اننگ میں صرف 6 چوکے لگانے میں کامیاب رہے جب کہ بھارتی بیٹرز نے 8 بار گیند کو باؤنڈری پار پہنچایا۔
اس میچ کی خاص بات یہ تھی کہ نیوزی لینڈ نے بھارتی بلے بازوں کے خلاف اپنے 8 بولرز کا استعمال کیا۔
بھارت اور نیوزی لینڈ کے درمیان تین ٹی ٹوئنٹی میچز پر مشتمل سیریز ایک ایک سے برابر ہے۔ تیسرا اور فیصلہ کن میچ آج احمد آباد میں کھیلا جائے گا۔
واضح رہے کہ ٹی 20 عالمی مقابلوں میں یہ اس نوعیت کا دوسرا واقعہ ہے تاہم بھارت کی سر زمین پر یہ انہونی پہلی بار ہوئی ہے۔
اس سے قبل کینیا اور آئرلینڈ کے درمیان 2012 میں کھیلا گیا ٹی ٹوئنٹی انٹرنیشنل بغیر کوئی چھکا لگائے کھیلا گیا تھا۔ اس کے علاوہ علاقائی لیگز میں تین ایسے میچز ہوئے ہیں جس میں بھی بیٹرز چھکے لگانے میں ناکام رہے تھے۔
