اسلام آباد: وزارتِ داخلہ نے ایگزیٹ کنٹرول لسٹ (ای سی ایل) میں کسی بھی شخص کا نام ڈالنے سے متعلق اہم تبدیلیاں لانے کا فیصلہ کرتے ہوئے سفارشات تیار کرلیں۔
تفصیلات کے مطابق وزارتِ داخلہ نے ای سی ایل میں نام ڈالنے سے متعلق سفارشات تیار کرلیں جن کا قائمہ کمیٹی کل جائزہ لے گی، سفارشات میں نئی تبدیلیاں شامل ہیں۔
وزارتِ داخلہ کی جانب سے تیار کی جانے والے سفارشات میں کہا گیا ہے کہ کسی بھی شخص کا نام ٹرائل کورٹ، عدالت عظمیٰ کی ہدایت پر ای سی ایل میں شامل کیا جائے گا۔
آئندہ ایگزیٹ کنڑول لسٹ میں کسی بھی شخص کا نام شامل کرنے کا اختیار سیکریٹری داخلہ کو دینے کی سفارش کی گئی جبکہ نئی سفارشات میں لفظ مجاز اتھارٹی کی جگہ سیکریٹری داخلہ لکھنے کی تجویز دی گئی ہے۔
وزارتِ داخلہ نے سفارش کی ہے کہ کسی بھی شخص کا نام چھان بین اور تحقیقات کے دوران ای سی ایل لسٹ میں شامل نہیں کیا جائے اور تین سال سے موجود اُن ناموں کو فہرست سے نکال دیا جائے جن کے لیے عدالتی حکم موجود نہیں ہے۔
سفارش میں یہ بھی کہا گیا ہے کہ کسی بھی شخص کا نام ایگزیٹ کنٹرول لسٹ میں شامل کرنے سے 7 روز پہلے متعلقہ فرد کو آگاہ کرنا لازم ہوگا۔
