The news is by your side.

Advertisement

انٹرنیٹ کو بڑا خطرہ لاحق ہے، ایف بی آئی نے خبردار کردیا

واشنگٹن : فیڈرل بیورو آف انویسٹی گیشن (ایف بی آئی) نے اپنی رپورٹ میں دنیا کو بڑی پریشانی سے آگاہ کیا ہے، ان کا کہنا ہے کہ بروقت اقدامات نہ کیے گئے تو انٹرنیٹ کے نظام کو خطرہ لاحق ہوسکتا ہے۔

تفصیلات کے مطابق امریکی تحقیقاتی ادارے ایف بی آئی نے انکشاف کیا ہے کہ روسی ہیکروں کا تیار کردہ ایک خطرناک وائرس دنیا بھر میں انٹرنیٹ راﺅٹرز کو نشانہ بنا رہا ہے اور صارفین کو خبردار کیا گیا ہے کہ اگر وہ کسی بڑے نقصان سے بچنا چاہتے ہیں تو فوری طور پر اپنے راﺅٹرز کو ری بوٹ کریں۔

نیشنل پوسٹ کے مطابق ایف بی آئی کا کہنا ہے کہ دنیا بھر میں لاکھوں انٹرنیٹ راﺅٹرزاس وائرس سے متاثر ہوچکے ہیں اور صارفین کی حفاظت کے لئے ضروری ہے کہ وہ اپنے انٹرنیٹ راﺅٹرز کو ری بوُٹ کریں یعنی ایک بار آف کرکے دوبارہ آن کریں۔

امریکی ٹیکنالوجی ماہرین کا کہنا ہے کہ راﺅٹرز کو نشانہ بنانے والا خطرناک وائرس ویب ٹریفک کو بلاک کرسکتا ہے، گھریلو یا کاروباری راﺅٹرز سے گزرنے والی معلومات اکٹھی کرسکتا ہے، ڈیوائس کو مکمل طور پر ڈس ایبل کرسکتا ہے اور صارفین کا قیمتی ڈیٹا چرا سکتا ہے۔

امریکی محکمہ انصاف کا کہنا ہے کہ یہ وائرس روسی ہیکرز ’سوفیسی گروپ‘ کی جانب سے پھیلایاجارہا ہے اور اس وقت دنیابھر میں لاکھوں راﺅٹرز اس کے کنٹرول میں آچکے ہیں۔ یہ ہیکر گروپ، جسے اے پی ٹی28 یا فینسی بیئر کے نام سے بھی جانا جاتا ہے۔

مبینہ طور پر روسی انٹیلی جنس ایجنسی کی ہدایت پر کام کررہا ہے، امریکی اور یورپی انٹیلی جنس ایجنسیوں کا کہنا ہے کہ اس سے پہلے 2016ءمیں امریکی الیکشن میں مداخلت اور ہیکنگ بھی اسی گروپ نے کی تھی۔

ایف بی آئی کا کہنا ہے کہ انفرادی اور کاروباری صارفین کو اپنے پرائیویٹ ڈیٹا کے تحفظ کے لئے کم از کم اپنے راﺅٹرز کو ری بوٹ ضرور کرنا چاہیے۔ اگر ان کے راﺅٹر پر وائرس موجود ہے تو ری بوٹ کرنے سے عارضی طور پر اس کی ایکٹویٹی بند ہوجائے گی۔

مزید سکیورٹی کے لئے صارفین سے کہا گیا ہے کہ وہ اپنے راﺅٹر کے فرم ویئر کو اپ گریڈ کریں اور بہترین و محفوظ پاسورڈ بھی استعمال کریں۔ اگر آپ کے راﺅٹرز پر ریموٹ مینجمنٹ سیٹنگز ہیں تو ایف بی آئی کا مشورہ ہے کہ انہیں بھی ڈس ایبل کردیں۔

Comments

یہ بھی پڑھیں