The news is by your side.

Advertisement

امید ہے عمران خان قوم کی توقعات پر پورا اتریں گے، انضمام الحق، مشتاق احمد

اسلام آباد: سابق کرکٹرز انضمام الحق اور مشتاق احمد نے عمران خان کو انتخابات جیتنے پر مبارکباد دیتے ہوئے کہا ہے کہ امید ہے عمران خان قوم کی توقعات پر پورا اتریں گے۔

تفصیلات کے مطابق چیف سلیکٹر قومی کرکٹ ٹیم انضمام الحق اور مشتاق احمد نے بنی گالا میں عمران خان سے ملاقات کی، ملاقات میں تحریک انصاف کے علی زیدی، اعجاز چوہدری، جاوید بدر اور فیصل جاوید شریک تھے۔

انضمام الحق نے کہا کہ عمران خان کی فتح پر دلی خوشی ہوئی امید ہے عمران خان عوام کی توقعات پر پورا اتریں گے، قوم کی دعائیں عمران خان کے ساتھ ہیں۔

چیف سلیکٹر کا کہنا تھا کہ عمران خان نے جو وعدے کیے ہیں وہ اس کو پورا کریں گے، ہماری دعائیں ان کے ساتھ ہیں، انشاء اللہ وہ قوم کے لیے بہترین کام کریں گے۔

سابق لیگ اسپنر مشتاق احمد نے کہا کہ عمران خان نے 22 سال جدوجہد کی، اللہ نے صلہ دیا، دعا ہے اللہ عمران خان کو ان کے مقصد میں کامیاب کرے۔

دونوں کھلاڑیوں کا کہنا تھا کہ عمران خان کی جیت کرکٹ کے تمام کھلاڑیوں کے لیے لمحہ مسرت ہے، اس پر انہیں خوشی ہے اور وہ عمران خان کو مبارکباد دینے آئے تھے۔

خیال رہے کہ 1992 میں جب قومی کرکٹ ٹیم نے عمران خان کی قیادت میں ورلڈ کپ جیتا تھا، انضمام الحق اور مشتاق احمد فاتح ٹیم کا حصہ تھے۔

واضح رہے کہ اس سے قبل بھی پاکستان تحریک انصاف کے چیئرمین عمران خان کو قومی کرکٹرز کی جانب سے مختلف پیغامات میں مبارکباد دی جاتی رہی ہے اور ملکی و بین الاقوامی کھلاڑیوں کی طرف سے عمران خان کے لیے نیک تمناؤں کا اظہار کیا ہے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں