روزمرہ زندگی میں اپنے موبائل فون سے محروم ہوجانا ایک بڑا جھٹکا ہوسکتا ہے کیونکہ اس صورت میں نہ صرف بھاری مالی نقصان ہوسکتا ہے بلکہ اپنے قیمتی ڈیٹا اور کانٹیکٹس سے بھی ہاتھ دھونے پڑ سکتے ہیں۔
ایسا ہی ایک واقعہ ایک اسکائی ڈائیور کے ساتھ پیش آیا جس کا آئی فون 12 ہزار فٹ کی بلندی سے نیچے گر پڑا اور حیران کن طور پر گرنے کے بعد بھی کام کرتا رہا۔
سوشل میڈیا پر وائرل ہونے والی اس واقعے کی ویڈیو میں دیکھا جاسکتا ہے کہ ڈائیور کے 12 ہزار فٹ کی بلندی سے چھلانگ لگانے کے بعد اس کی جیب سے آئی فون نکل کر ہوا میں تیرنے لگا۔
View this post on Instagram
ڈائیونگ کو ریکارڈ کرنے کے لیے ڈائیور کا ایک دوست بھی اس کے ساتھ فضا میں محو پرواز تھا، دوست کا کہنا تھا کہ پہلے وہ سمجھا کہ ڈائیور کے ڈائیونگ سامان کا کوئی پرزہ الگ ہوگیا ہے اور اب شاید وہ خطرے میں ہے۔
تاہم دونوں کے بحفاطت زمین پر لینڈ کرنے کے بعد انہیں پتہ چلا کہ وہ پرزہ نہیں بلکہ آئی فون تھا۔
بعد ازاں ڈائیور نے فائنڈ مائی آئی فون نامی ایپ کے ذریعے اپنے فون کو ٹریس کیا اور اس کی لوکیشن ایک صحرا میں ملی۔ وہاں سے وہ فون اس حالت میں ملا کہ اس کی اسکرین ٹوٹ پھوٹ چکی تھی تاہم وہ اب تک کام کر رہا تھا۔
