کراچی: اداکار و میزبان یاسر حسین نے ایوارڈ شو کی تقریب میں اقرا کو پروپوز کیا اور منگنی کی انگوٹھی پہنائی تھی اب مداحوں کو انتظار ہے کہ یہ جوڑا رشتہ ازدواج میں کب منسلک ہوگا، یاسر اور اقرا نے اس پر خاموشی توڑ دی ہے۔
تفصیلات کے مطابق معروف پاکستانی اداکارہ اقرا عزیز اور یاسر حسین نے ایک ٹی وی انٹرویو کے دوران اپنی شادی کے حوالے سے کھل کر باتیں کی، اقرا عزیز کا کہنا تھا کہ میں عرصے سے انڈسٹری میں بہت محنت کررہی ہوں اور اب وقت آگیا ہے کہ زندگی کی رفتار میں کمی لائی جائے۔
اقرا عزیز نے کہا کہ شادی جلد ہوگی، مگر ہم سادہ انداز سے شادی کرنا چاہتے ہیں جو ہمارے گھروں میں ہوگی، ہم اس کو پرتعیش بنانے کا کوئی ارادہ نہیں رکھتے، اپنی شادی کے دن میں بس اس فکر سے آزاد رہنا چاہتی ہوں کہ لوگ ایک اداکارہ اقرا عزیز کو دیکھ رہے ہیں۔
مزید پڑھیں: اقرا عزیز نے تنقید پر خاموشی توڑ دی
یاسر حسین نے کہا کہ شادی اگر میں سینئر فن کاروں کو مدعو کرتا ہوں تو میں دلہا کے طور پر ایک جگہ بیٹھ کر انہیں نظرانداز نہیں کرسکتا، یہ عدم احترام ہوگا، میرا خاندان شادی میں شرکت کرے گا اور اس دن میں بس ان کی شرکت چاہتا ہوں بعدازاں ہم انڈسٹری کے دوستوں کے لیے ایک پروقار تقریب کا انعقاد کریں گے۔
یاسر حسین نے مزید کہا کہ ہم ایک شادی پر بہت زیادہ خرچہ کیوں کریں، اپنی شادی پر میں یہ مثال قائم کرنا چاہتا ہوں کہ ہم پرتعیش اور مہنگی شادی کے خواہش مند نہیں ہیں۔
یہ پڑھیں: میں شادی کے لیے راضی ہوں لیکن وہ نہیں مان رہی
واضح رہے کہ اداکار و میزبان یاسر حسین نے اقرا عزیز کو ایوارڈز تقریب کے دوران شادی کی پیش کش کی جسے اقرا عزیز نے قبول کرلیا تھا۔
خیال رہے کہ اے آر وائی نیوز کے پروگرام ہر لمحہ پرجوش میں یاسر حسین نے شرکت کی تھی جس میں ان کا کہنا تھا کہ شادی کے لیے میں تو راضی ہوں لیکن وہ ہاں نہیں کررہی ہے۔
