کراچی : پاکستان شوبز کی نامور اداکارہ اقراء عزیز نے اپنے شوہر یاسر حسین سے محبت اور شادی کی اصل وجہ بیان کردی، سوشل میڈیا پر ان کی پوسٹ کو مداحوں نے بہت پسند کیا۔
اداکار یاسر حسین کی اہلیہ اور اداکارہ اقراء عزیز نے سوشل میڈیا پر کی گئی ایک طویل پوسٹ میں اپنے شوہر اور شادی سے متعلق بتایا کہ لوگوں کی شدید تنقید کے باوجود انہیں یاسر حسین سے محبت کیوں ہوئی؟
مختصر ویڈیو اور تصاویر کی مقبول ترین ایپ انسٹاگرام پر شیئر کی گئی ایک پوسٹ میں اقرا عزیز نے لکھا کہ میں نے یاسر کا انتخاب اپنے لیے اس لیے کیا کیونکہ یہ ہمیشہ سچ بولتے ہیں اور لوگوں میں فرق نہیں کرتے۔
اقرا عزیز نے لکھا کہ یاسر سب کی عزت کرتے ہیں اور ان کو ان کا کریڈٹ بھی دیتے ہیں۔ اس سب سے بڑھ کر یہ کہ عورت کی صحیح معنوں میں عزت کرنا جانتے ہیں، میری امی اور بہن کے بعد ان سے زیادہ اعتماد مجھے کسی نے نہیں دیا۔
اداکارہ نے لکھا کہ آج کل کے زمانے میں یہ ایک بڑی بات ہے کہ ایک مرد، آپ کا شوہر، آپ کو اور آپ کے کام، آپ کے خوابوں کو سپورٹ کرے اور یہ چاہے کہ آپ کامیابی کی بلندیوں کو سر کریں۔
اقرا عزیز نے مزید لکھا کہ ایک عورت سے پیار کرنا، اس کی عزت کرنا اور اسے ہزاروں کروڑوں لوگوں کے سامنے اپنا تسلیم کرنا، اپنے گھر کی عزت بنانا، اس کے خوابوں کو پورا کرنے میں نہ صرف اسے سپورٹ کرنا بلکہ اس کی مدد بھی کرنا، اپنی خوشی سے زیادہ اس کی خوشی کا خیال ہونا، میاں بیوی یا مرد و عورت میں فرق نہ کرنا، یہ ہر لڑکی کا خواب ہوتا ہے اور میرا یہ خواب پورا ہوا’۔
یاد رہے کہ اقراء عزیز اور یاسر حسین نے28 دسمبر 2019 کو کراچی میں شادی کی تھی اور دونوں کی شادی کے سوشل میڈیا پر خوب چرچے بھی ہوئے تھے۔
یاسر حسین نے جولائی 2019 میں ایک تقریب کے دوران اقرا عزیز کو شادی کی پیشکش کی تھی، اس موقع پر انہوں نے اقراء عزیز کو سب کے سامنے انگوٹھی پہنائی جبکہ ان کے گال پر بوسہ بھی دیا تھا جس کے بعد دونوں پر تنقید بھی کی گئی۔
