ریاض: سعودی عرب نے ایران کا نیا سائبر حملہ ناکام بنا دیا، ایران اس سے قبل سعودی عرب پر متعدد سائبر حملے کر چکا ہے۔
سعودی خبر رساں ادارے کے مطابق سعودی عرب نے ایران کا نیا سائبر حملہ ناکام بنا دیا ہے، مذکورہ حملہ 29 دسمبر 2019 کو ایران نے اس دن کیا جس روز امریکی فوج نے ایران کے حمایت یافتہ وظیفہ خواروں کے ٹھکانوں پر حملہ کیا تھا۔
سعودی ٹیکنالوجی امور کے ماہرین نے ایرانی سائبر حملے کو Dustman کا نام دیا ہے۔
انہوں نے باقاعدہ اس تخریبی حملے کو ایران سے منسوب نہیں کیا، اس کے باوجود تکنیکی رپورٹ پڑھنے والے ماہرین کا کہنا ہے کہ سابقہ سائبر حملوں اور نئے حملے کے درمیان بڑی مماثلت پائی جاتی ہے۔
اسی بنیاد پر کہا جارہا ہے کہ 29 دسمبر کا سائبر حملہ ایران ہی نے کیا۔ اطلاعات کے مطابق مذکورہ سائبر حملہ ڈیٹا مٹانے کے لیے کیا گیا تھا۔
خیال رہے کہ امریکی سیکیورٹی ادارے ایرانی جنرل سلیمانی کے قتل کے بعد ایران کے سائبر حملوں میں اضافے کا خدشہ ظاہر کرچکے تھے تاہم مذکورہ حملہ اور اس جیسے دیگر سابقہ سائبر حملوں کو دیکھتے ہوئے امکان ظاہر کیا جارہا ہے کہ ایران معمولی سطح پر سائبر جنگوں میں دلچسپی رکھتا ہے۔
