(3 مارچ 2026): ایران اسرائیل جنگ اور مشرق وسطیٰ کی فضائی حدود بند ہونے کے باعث ایوی ایشن نیٹ ورک کو یومیہ 500 ملین ڈالر کا نقصان پہنچ رہا ہے۔
ایران اسرائیل جنگ کے بعد مشرق وسطیٰ جنگ کی لپیٹ میں ہے اور تمام خلیجی ممالک نے فضائی حدود بند کر دی ہیں۔ 3400 پروازیں منسوخ ہو چکی ہیں اور خلیجی خطے کی ایوی ایشن نیٹ ورک کا نقصان یومیہ 500 ملین ڈالر تک جا پہنچا ہے۔
مشرق وسطیٰ میں سیاسی اور جنگی تناؤ کے باعث خلیجی ممالک کے بڑے ہوائی اڈوں پر آپریشنل افراتفری پھیلی ہوئی ہے اور پورے خطے میں کم از کم سات بڑے ہوائی اڈوں پر 3400 سے زائد پروازیں منسوخ یا ری روٹ کر دی گئی ہیں۔
پروازیں منسوخ ہونے سے صرف ایوی ایشن کا ہی نقصان نہیں ہو رہا بلکہ لاکھوں افراد رل گئے ہیں اور ان کے معمولات شدید متاثر ہو رہے ہیں۔
اس وقت دبئی، ابوظہبی، دوحہ، کویت اور بحرین سمیت اہم ایوی ایشن ہبز کو آپریشنل دباؤ کا سامنا ہے۔ پاکستان سے متحدہ عرب امارات (یو اے ای) اور دیگر خلیجی ممالک کے لیے 200 سے زائد پروازیں بھی متاثر ہوئی ہیں، جس سے نہ صرف مسافر بلکہ کارگو آپریشنز اور تجارتی سرگرمیاں بھی متاثر ہوئی ہیں۔
ہوا بازی کے ماہرین نے خبردار کیا ہے کہ اگر روزانہ ہزاروں پروازیں منسوخ یا دوبارہ روٹ کی جاتی رہیں تو ایئر لائن انڈسٹری کو آپریشنل اور ریونیو کا نقصان ہو سکتا ہے جو کہ 350 ملین سے 500 ملین ڈالر یومیہ کے درمیان ہے جو تقریباً 2 سے 4 بلین درہم کے برابر ہے۔
ان نقصانات میں ری روٹنگ، عملے کے بڑھتے ہوئے اخراجات، مسافروں کی رہائش اور دوبارہ بکنگ کے اخراجات، اور کارگو میں تاخیر کی وجہ سے ایندھن کے اضافی اخراجات شامل ہیں۔
ایران، اسرائیل اور امریکا جنگ سے متعلق تمام خبریں
صنعت کے ماہرین خبردار کرتے ہیں کہ اگر کشیدگی برقرار رہی تو فضائی کرایوں میں بھی اضافہ ہو سکتا ہے، اور خطے کی سیاحت، تجارت اور سرمایہ کاری کی سرگرمیوں کو اہم دھچکے کا سامنا کرنا پڑ سکتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں