تہران: عالمی طاقتوں کا دباؤ نظراندار کرتے ہوئے ایران نے اپنے بیلسٹک میزائل کی رونمائی کردی۔
غیر ملکی میڈیا رپورٹ کے مطابق ایران کے جدید ترین بیلسٹک میزائل کی رونمائی آج ایک تقریب میں کی گئی جس میں ایرانی وزیر دفاع نے بھی شرکت کی۔
اس تقریب میں وزارت دفاع کی ایرو اسپیس انڈسٹریز آرگنائزیشن کی تازہ ترین مصنوعات کو بھی متعارف کرایا گیا جن میں 2000 کلومیٹر تک مار کرنے والے بیلسٹک میزائل خرمشہر بھی شامل تھا۔
دفاعی حکام نے خرمشہر بیلسٹک میزائل کی جنریشن 4 کو خیبر کے نام سے متعارف کرایا اس کی رینج 2,000 کلومیٹر (1,243 میل) اور یہ 1,500 کلوگرام وار ہیڈ لے جا سکتا ہے۔
میزائل کے بارے میں دعوی کیا گیا ہے کہ یہ اپنے ہدف کو درست طریقے سے نشانہ بناسکتا ہے۔
دفاعی حکام کے مطابق خرمشہر 4 میزائل کا انجن اپنی نوعیت کے طاقتور ترین انجنوں میں شامل ہے جس کے نتیجے میں خلا میں اس کی رفتار، آواز کی رفتار سے سولہ گنا زیادہ اور زمین سے قریب آواز کی رفتار سے آٹھ گنا زیادہ ہو جاتی ہے۔
ایران نے امریکا کی مخالفت اور یورپی ممالک کی طرف سے تشویش کے اظہار کے باوجود اپنے میزائل پروگرام بالخصوص اپنے بیلسٹک میزائلوں کو وسعت دی ہے۔
ایران کا کہنا ہے کہ اس کا یہ پروگرام خالصتاً دفاعی ہے۔
