تہران: ایران میں فوجی کارگو طیارہ گرکر تباہ ہوگیا جس کے نتیجے میں پندرہ افراد موقع پر ہی ہلاک ہوگئے۔
تفصیلات کے مطابق حادثہ ایرانی دارالحکومت تہران کے قریب پیش آیا، اس حادثے میں 15 افراد ہلاک ہوگئے جبکہ صرف ایک فلائٹ انجینیئر خوش قسمتی سے زندہ بچ نکلا۔
غیر ملکی خبر رساں ادارے کا کہنا ہے کہ حادثے کا شکار ہونے والے طیارے میں سولہ افراد سوار تھے جن میں سے صرف ایک فلائٹ انجینئیر زندہ بچا۔
حکام کے مطابق طیارہ لینڈنگ کی کوشش میں پائلٹ کی غلطی سے گرکرتباہ ہوا، فوج کا یہ مال بردار طیارہ وسطی صوبے البرز میں قراج کے نزدیک فتح کے ہوائی اڈے کی حدود میں گر کر تباہ ہوا۔
حادثے کے بعد جہاز کا بلیک باکس تلاش کرلیا گیا ہے، مال بردار طیارے بوئنگ 707 میں گوشت لدا ہوا تھا اور وہ کرغیزستان کے دارالحکومت بشکک سے آرہا تھا۔
اس سے قبل گذشتہ سال فروری میں ایران میں ایک طیارہ حادثے نے 66 افرار کی جانیں نگل لی تھیں۔ علاوہ ازیں اگست 2014 میں بھی اسی نوعیت کے حادثے میں 40 افراد ہلاک ہوئے تھے۔
خیال رہے کہ امریکا کی سخت اقتصادی پابندیوں کے باعث ایران نئے جہاز خریدنے سے قاصر ہے، جبکہ طیارہ سازی کے لیے دیگرے ممالک سے پرزے بھی نہیں خرید سکتا۔
