تہران : ایران کے اسکولوں میں طالبات کو زہر دینے کے الزام میں پولیس نے 100سے زائد ملزمان کو گرفتار کرلیا، ایرانی سپریم کمانڈر نے ملزمان کو نشان عبرت بنانے کے احکامات دے دیئے۔
غیرملکی خبر رساں ادارے کی رپورٹ کے مطابق ایرانی وزارت داخلہ کا کہنا ہے ابتدائی تحقیقات کے مطابق ملزمان نے اسکول بند کرانے کیلئے بےضرر اور بدبودار مادوں کا استعمال کیا تھا۔
دشمن ملک کے تعلیمی نظام میں خوف وہراس پیدا کرنے کی کوشش کررہےہیں، ایران کے سپریم کمانڈرعلی خامنہ ای نے زہر دینے میں ملوث افراد کو عبرتناک سزا دینے کا حکم دیا ہے۔
وزارت داخلہ کے بیان میں مزید واضح کیا گیا کہ حراست میں لیے گئے افراد میں ایسے لوگ بھی شامل ہیں جن کا مقصد عوام اور طلبہ کے دلوں میں دہشت پھیلانا، اسکولوں کو بند کرنا اور ایرانی حکومت کے بارے میں شکوک پیدا کرنا تھا۔
گزشتہ ہفتے ایرانی صدر ابراہیم رئیسی نے اسکول کی طالبات کو زہر دینے کے واقعے کی تحقیقاتی ٹیم تشکیل دینے کا حکم دیا تھا۔ انہوں نے اس واقعے کو "دشمن کی سازش” قرار دیا تھا۔
واضح رہے کہ کچھ روز قبل ایران میں بچیوں کو اسکول جانے سے روکنے کیلئے زہر دینے کے واقعات کا انکشاف ہوا تھا۔
ایران میں گزشتہ سال نومبر سے اسکول کی طالبات میں زہر کی وجہ سے سانس لینے کی تکلیف کے سیکڑوں کیسز
سامنے آئے جن میں کئی لڑکیوں کو اسپتال میں داخل کرایا گیا۔
