تہران: نو منتخب ایرانی صدر مسعود پیزشکیان نے اپنے ملک کے اسرائیل مخالف مؤقف کی توثیق کی ہے۔
غیر ملکی میڈیا رپورٹس کے مطابق نو منتخب ایرانی صدر نے اسرائیل مخالف پالیسی کی توثیق کر دی ہے، مسعود پیزشکیان نے اسرائیل کے خلاف ایرانی مؤقف کا اعادہ کرتے ہوئے کہا کہ ایران نے ناجائز صہیونی حکومت کے خلاف مزاحمت کی ہمیشہ حمایت کی ہے۔
پیر کے روز ایرانی صدر نے لبنان کے گروپ حزب اللہ کے سربراہ حسن نصر اللہ کو ایرانی میڈیا پر جاری پیغام میں کہا کہ ایران غیر قانونی صہیونی حکومت کے خلاف مزاحمت کی حمایت جاری رکھے گا، انھوں نے فلسطینیوں کے خلاف اسرائیل کے اقدامات کی مذمت بھی کی۔
خارجہ پالیسی سے متعلق اپنے اوّلین بیانات میں سے ایک میں مسعود پیزشکیان نے کہا کہ انھیں یقین ہے کہ مزاحمتی تحریک غزہ میں اپنے دشمن اسرائیل کی ’’جنگی اور مجرمانہ پالیسیوں‘‘ کو روک دے گی۔
واضح رہے کہ غزہ میں جنگ شروع ہونے کے بعد سے حزب اللہ اور اسرائیل کے درمیان لبنان کی سرحد پر قریب قریب روزانہ فائرنگ کا تبادلہ ہوتا آ رہا ہے، جس سے لڑائی کے بڑھنے کے ساتھ ساتھ ہمہ گیر جنگ کے امکانات کے بارے میں عالمی خطرے کا اظہار بھی کیا جا رہا ہے۔