تہران : ایران میں صدارتی انتخابات کیلئے ووٹنگ کا عمل جاری ہے، حسن روحانی اور ابراہیم رئیسی کےدرمیان کانٹے کا مقابلہ متوقع ہے۔
ایران کے بارہویں صدر کے انتخاب کے لئے ووٹنگ کا آغاز ہوگیا، ایرانی عوام آج نئے صدر کا چناؤ کریں گے، حسن روحانی اور مذہبی رہنما ابراہیم رئیسی کے درمیان کانٹے کامقابلہ متوقع ہے، ایران میں پرامن پولنگ کیلئے سکیورٹی کے سخت انتظامات کئے گئے ہیں، ایران کی 8 کروڑ کی آبادی میں سے 5 کروڑ 60 لاکھ سے زائد ووٹرز حقِ رائے دہی استعمال کریں گے۔
ایران کے صدارتی انتخابات میں 6 امیدوار میدان میں تھے جن میں سے دو امیدوارو انتخابات سے دستبردار ہوگئے. اس وقت چار امیدوار میدان میں جن میں سید مصطفی آقامیرسلیم، حسن روحانی، سید ابراہیم رئیسی اور سید مصطفی ہاشمی طبا شامل ہیں۔
حسن روحانی اور ابراہیم رئیسی کےدرمیان کانٹے کا مقابلہ متوقع
حسن روحانی دوسری مرتبہ منصبِ صدارت کےامیدوار ہیں جبکہ 56سالہ سخت گیر مذہبی رہنما ابراہیم رئیسی کو آیت اللہ خامنہ ای کا جانشین تصور کیا جاتا ہے۔
ایران کے انتخابی قوانین کے تحت کسی بھی امیدوار کو جیتنے کے لئے کل ڈالے گئے ووٹوں میں سے پچاس فی صد ووٹوں کا حاصل کرنا ضروری ہے. بصورت دیگر سب سے زیادہ ووٹ حاصل کرنے والے دو امیدواروں کے درمیان ایک ہفتے کے اندر دوبارہ پولنگ کرائی جائے گی۔
اگر صدارتی انتخابات دوسرے مرحلے میں داخل ہوتے ہیں تو جمعہ 26 مئی کو دوسرے مرحلے کے لئےووٹ ڈالے جائیں گے۔
ایران میں صدارتی انتخاب کے ساتھ اسلا مک سٹی اینڈ ویلج کونسلز کے بلدیاتی انتخابات اور بعض حلقو ں میں درمیانی مدت کے پارلیمانی انتخابات بھی ہورہے ہیں۔
ایران کی وزارت داخلہ کے مطابق پرامن پولنگ یقینی بنانے کیلئے سکیورٹی کے سخت اقدامات کئے گئے ہیں۔
