تہران: ایرانی صدر حسن روحانی نے کہا ہے کہ ایرانی قوم اقتصادی جنگ میں ایک بار پھر دشمنوں کو پشیمان کردے گی۔
تفصیلات کے مطابق ایران کے صدر ڈاکٹر حسن روحانی نے تہران میں منعقدہ ایک کانفرنس میں ایرانی جانثاروں کی قدردانی کرتے ہوئے کہا ہے کہ ایرانی قوم دشمنوں کے مقابلے میں پورے وقار کے ساتھ کھڑی ہوئی ہے۔
انہوں نے کہا کہ دشمن، ایرانی قوم کو عزت و آزادی سے پیچھے ہٹنے پر مجبور کرنے کی کوشش کر رہے ہیں لیکن ایرانی قوم نے تہیہ کر رکھا ہے کہ وہ دشمن کی کوئی سازش کامیاب نہیں ہونے دے گی اور وہ دشمنوں کو پشیمان کردے گی۔
ڈاکٹر حسن روحانی نے کہا کہ گذشتہ ایک سال کے دوران سخت ترین پابندیوں اور دباؤ کے باوجود ایرانی قوم نے استقامت کا سلسلہ جاری رکھا ہے اور وہ نہ صرف یہ کہ تسلیم نہیں ہو گی بلکہ دشمنوں کو کامیاب بھی نہیں ہونے دے گی۔
ان کا کہنا تھا کہ ایرانی قوم استقامت کے اپنے اسی جذبے کی بدولت امریکا و غاصب صیہونی حکومت سمیت اپنے تمام دشمنوں کو شکست دے گی۔
کیا امریکا ایران تنازع کے باوجود جاپانی وزیر اعظم ایران کا دورہ کریں گے؟
صدر مملکت نے خرم شہر کی آزادی کی سالگرہ کی مبارک باد پیش اور اس کارنامے کو دفاع کے میدان میں ایرانی قوم کی شجاعت و بہادری اور قومی عزت و وقار کا بیّن ثبوت قرار دیتے ہوئے کہا کہ ایرانی قوم نے اپنے ملک کے شہر، خرم شہر کو اس طریقے سے آزاد کرایا کہ عراق کی اس وقت کی بعثی صدام حکومت کے کئی فوجی افسروں سمیت انیس ہزار فوجی اہلکاروں کو قیدی بنا لیا تھا۔
