تہران: ایران کے جنوبی علاقے میں لڑاکا طیارہ گر کر تباہ ہوگیا جس کے نتیجے میں پائلٹ ہلاک اور معاون پائلٹ شدید زخمی ہوگیا۔
غیرملکی خبررساں ادارے کے مطابق لڑاکا طیارہ ایف فائیو عراقی سرحد کے قریب صوبے خوزستان میں لینڈنگ کے دوران حادثے کا شکار ہوا، جس کے نتیجے میں پائلٹ ہلاک اور معاون پائلٹ شدید زخمی ہوگیا۔
ایران نے ایف فائیو طیارے اسلامی انقلاب سے قبل 1979 میں امریکا سے خریدے تھے اور اس وقت تہران کے پاس 48 ایسے طیارے فعال ہیں۔
واضح رہے کہ ایران نے گزشتہ ہفتے مقامی طور پر تیار کردہ پہلے جنگی جہاز کی رونمائی کی تھی جو ایف فائیو کے ماڈل سے کافی مماثلت رکھتا ہے۔
رپورٹس کے مطابق چوتھی جنریشن کے کوسار طیارے کی رونمائی تہران میں قومی دفاعی صنعت کی نمائش کے دوران کی گئی تھی جس میں ایرانی صدر حسن روحانی نے بھی شرکت کی تھی۔
ایرانی سرکاری ٹی وی کے مطابق کوسار طیارہ ایڈوانس ٹیکنالوجی اور ملٹی پرپز ریڈار سے لیس ہے جو کہ مکمل طور پر ایران میں تعمیر کیا گیا ہے۔
