واشنگٹن: امریکا اپنی نئی سفارتی مہم کے تحت یورپ میں ایرانی فضائی کمپنی پر پابندی عائد کرانے کی کوشش کررہا ہے۔
تفصیلات کے مطابق امریکا اپنے یورپی اتحادی ممالک کو ایران کی ایئرلائن کمپنی پر پابندی عائد کرنے پر قائل کرنے کی کوشش کررہا ہے۔
غیر ملکی میڈیا نے دعویٰ کیا ہے کہ جرمنی کے بعد امریکا دیگر پورپی اتحادی ممالک پر زور دے رہا ہے کہ وہ ایران کی فضائی کمپنی ‘ماہان ایئر’ پر پابندیاں عائد کریں۔
امریکا نے یورپ میں نئی سفارتی مہم کے تحت موقف اپنایا ہے کہ ایرانی فضائی کمپنی جاسوسی، جنگجوؤں کو جنگ زدہ علاقوں بالخصوص شام اور عراق تک پہنچانے کے لیے استعمال کی جاتی رہی ہے۔
امریکا اس بات پر زور دے رہا ہے کہ یورپی ممالک ایران کی فضائی کمپنی پر جنگجوؤں کو شام لے جانے میں ملوث ہونے اور بین الاقوامی فضائی قوانین خلاف ورزی پر پابندی عاید کرنے کی مشترکہ قرارداد منظور کریں۔
جرمنی نے ایران کی ایئرلائن ماہان ایئر پر پابندی عائد کردی
خیال رہے کہ گذشتہ دنوں جرمنی نے ایران کی دوسری بڑی ایئرلائن ماہان ایئر پر پابندی عائد کی ہے، اور امریکا کی جانب سے اس کا خیرمقدم کیا گیا ہے۔
ماہان ایئر لائن 2011 سے امریکی پابندیوں کی فہرست میں پر ہے اور یورپی یونین کے متعدد ممالک ایران پر الزام عائد کرتے ہیں کہ وہ یورپی براعظم پر حملوں کے لیے جاسوسی کے عمل میں مصروف ہے۔
یاد رہے کہ گزشتہ سال مئی میں امریکی محکمہ خزانہ نے ایران کی دو فضائی کمپنیوں ماہان ایئر اور معراج ایئر سے وابستہ اداروں کے علاوہ دو ایرانیوں اور ایک ترکی کمپنی پر بھی پابندی عائد کی تھی۔
