بغداد: عراق میں شوہر نے فیصلے کی مخالفت کرنے پر بیوی کو چلتی گاڑی سے دھکا دے کر مار ڈالا۔
عرب میڈیا کے مطابق جنوبی عراق کے ذیقار صوبے میں خاتون اپنے شوہر کے ہمراہ گاڑی میں سفر کررہی تھی کہ بات چیت کے دوران خاتون نے تیسری شادی کی مخالفت کی تو شوہر کو غصہ آگیا، اس نے تیز رفتار گاڑی سے بیوی کو دھکا کر نیچے پھینک دیا۔
گاڑی سے نیچے گرائے جانے کے نتیجے میں خاتون شدید زخمی ہوگئیں بعدازاں اسپتال میں زخموں کی تاب نہ لاکر چل بسیں۔
رپورٹ کے مطابق یہ واقعہ ذیقار صوبے کے ضلع قلعہ سقر میں گزشتہ ہفتے پیش آیا، زخمی خاتون علاج کے لیے اسپتال میں داخل تھیں۔
خاتون نے دوران علاج بیان ریکارڈ کروایا جس میں انہوں نے شوہر کو اس واقعے کا ذمہ دار قرار دیا تھا۔
پولیس کا کہنا ہے کہ خاتون نے شوہر کو تیسری شادی سے روکنے کی کوشش کی تھی اور وہ خود ملزم کی دوسری بیوی تھی۔
عراقی پولیس نے ملزم کو گرفتار کرلیا، پولیس کا کہنا ہے کہ ملزم کو کارروائی کے لیے عدالت میں پیش کیا جائے گا۔
واضح رہے کہ عراق میں خواتین کیخلاف تشدد کے واقعات میں اضافہ دیکھنے میں آیا ہے جس کے سبب گھریلو تشدد کے انسداد کا قانون جاری کرنے کا مطالبہ زور پکڑ گیا ہے۔