راولپنڈی : قومی انسداد دہشت گردی مرکز (این سی ٹی سی) میں عراقی فوجی دستوں کی ٹریننگ مکمل ہوگئی، مذکورہ تربیت 24ستمبر سے29 نومبر تک جاری رہی۔
پاک فوج نے 24 ستمبر سے 29 نومبر 2025 تک نیشنل کاؤنٹر ٹیرر ازم سینٹر (این سی ٹی سی) میں عراقی فوج کے دستوں کے لیے انسدادِ دہشت گردی کی تربیت کامیابی سے مکمل کرلی۔
پاک فوج کے شعبہ تعلقات عامہ (آئی ایس پی آر) کے مطابق پروگرام انسداد دہشت گردی کی مہارت اور آپریشنل تیاری کو بڑھانے کے لیے ڈیزائن کیا گیا، دونوں ممالک کے فوجیوں کو ایک انتہائی تربیتی ماحول میں اکٹھا کیا۔
پاکستان میں ٹریننگ مکمل کرنے والے446عراقی ٹرینیز کی گریجویشن تقریب میں پاک فوج کے سینئر افسران اور عراقی عسکری نمائندوں نے شرکت کی۔
اس موقع پر پاکستان و عراق کے دستوں نے پیشہ ورانہ مہارت اور شاندار کارکردگی کا مظاہرہ کیا ٹریننگ میں انسداد دہشت گردی، ٹیکٹیکل ڈرلز اور مشن پلاننگ پر فوکس کیا گیا۔
آئی ایس پی آر کے مطابق تمام تربیتی اہداف کامیابی سے حاصل کرلیے گئے، پاکستان اور عراق کے دفاعی تعاون میں مزید مضبوطی آئی۔
دونوں ممالک کے عہدیداران نے علاقائی سیکیورٹی اور مشترکہ دفاعی تیاریوں کے عزم کا اعادہ کیا، ، تربیتی نصاب انسداد دہشت گردی کی کارروائیوں میں بنیادی صلاحیتوں کی تعمیر پر توجہ مرکوز کرتا ہے۔
ترجمان پاک فوج نے کہا کہ بشمول ٹیکٹیکل مشقیں، خصوصی مشن کی منصوبہ بندی، اور مربوط جنگی تیاری کے تحت تربیت یافتہ افراد نے پورے کورس میں غیر معمولی پیشہ ورانہ مہارت، آپریشنل نظم و ضبط اور لگن کا مظاہرہ کیا جو پاکستان آرمی اور عراقی مسلح افواج کے درمیان تعاون کی گہرائی کو ظاہر کرتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں