اسلام آباد: وزیر خزانہ اسحاق ڈار نے امریکی سفیر سے آئی ایم ایف معاہدے کے لیے تعاون کی درخواست کر دی ہے۔
تفصیلات کے مطابق وزیر خزانہ اسحاق ڈار سے امریکی سفیر ڈونلڈ بلوم کی ملاقات ہوئی ہے، جس میں اسحاق ڈار نے آئی ایم ایف معاہدے کے لیے امریکی سفیر سے بات چیت کی۔
ذرائع وزارت خزانہ کا کہنا ہے کہ امریکی سفیر سے اسحاق ڈار نے درخواست کی کہ آئی ایم ایف سے معاہدہ کرنے کے لیے کردار ادا کریں۔
وزیر خزانہ اسحاق ڈار نے امریکی سفیر کو معاشی صورت حال اور آئی ایم ایف معاہدے کے حوالے سے پیش رفت سے آگاہ کیا، انھوں نے امریکی سفیر کو سعودی عرب سے 2 ارب ڈالر فنانسنگ پر بھی آگاہی دی۔
ذرائع کے مطابق اسحاق ڈار نے ڈونلڈ بلوم کو بتایا کہ متحدہ عرب امارات سے بھی 1 ارب ڈالر فنانسنگ کے حوالے سے بات چیت جاری ہے۔
ذرائع کا کہنا ہے کہ امریکی سفیر نے آئی ایم ایف معاہدے کے سلسلے میں کردار ادا کرنے اور امریکی تعاون بڑھانے کی یقین دہانی کرائی ہے۔
