دمشق: شامی شہر منبج میں امریکی اتحادی فورسز پرخودکش حملے میں 2 امریکی فوجیوں سمیت 4 افراد ہلاک ہوگئے۔
تفصیلات کے مطابق شام کے شہر منبج میں امریکی فوجی مرکز کے پاس ہونے والے خودکش حملے میں دو امریکی فوجیوں سمیت 4 امریکی شہری ہلاک ہوگئے۔
شام میں تعینات امریکی سینٹرل کمانڈ کے مطابق ہلاک شہریوں میں ایک محکمہ سویلین ڈیفنس کا ملازم اورایک ملٹری کنٹریکٹر شامل ہے۔ دھماکے میں تین دیگرامریکی فوجی زخمی بھی ہوئے ہیں۔
دوسری جانب ترک صدر رجب طیب اردغان نے منبج میں ہونے والے خودکش حملے میں امریکی اہلکاروں کی ہلاکت کی تصدیق کی ہے۔
رجب طیب اردغان کے مطابق خودکش دھماکے کا مقصد امریکی صدر ڈونلڈ ٹرمپ کے شام سے انخلا کے فیصلے پراثرانداز ہونا ہے۔
امریکی صدر ڈونلڈ ٹرمپ نے شام سے امریکی فوج واپس بلانے کا اعلان کردیا
یاد رہے کہ گزشتہ سال 20 دسمبر کو امریکی صدر ڈونلڈ ٹرمپ نے شام سے امریکی فوج واپس بلانے کا اعلان کرتے ہوئے کہا تھا کہ داعش کو شکست ہوئی، اس تاریخی فتح کے بعد امریکی فوجیوں کو واپس بلانے کا وقت آگیا ہے۔
واضح رہے کہ امریکا نے شام میں نومبر دوہزارپندرہ میں فوج تعینات کی تھیں جس کے بعد یہ پہلا اتنا بڑا دھماکا ہے جس میں چار امریکی شہری مارے گئے ہیں۔
