اسلام آٓباد : وفاقی دارالحکومت اسلام آباد کے ہفتہ وار بازار میں اچانک آگ بھڑک اٹھی، فائربریگیڈ کی 16 گاڑیاں آگ بجھانے میں مصروف تھیں، آگ پر دو گھنٹے کی کوششوں کے بعد قابو پایا گیا۔
تفصیلات کے مطابق اسلام آباد کے علاقے ایچ نائن میں واقع سستے بازار میں آگ لگ گئی، یہ بازار آج بند تھا کیونکہ مذکورہ بازار اتوار کے روز عوام کیلئے کھولا جاتا ہے۔
اے آر وائی نیوز کے نمائندہ فرخ اعجاز کے مطابق بازار میں آتشزدگی کا یہ واقعہ اس جگہ پیش آیا جہاں کپڑوں کے بڑے بڑے گٹھرے رکھے ہوئے تھے جس کی وجہ سے آگ نے تیزی پکڑی۔
دیکھتے ہی دیکھتے آگ دوسری جگہ پر بھی پھیلنے لگی آگ کے شعلے اور دھویں کے بادل تیزی سے بلند ہوتے رہے۔ تاہم فائر بریگیڈ کی گاڑیوں نے بروقت پہنچ کر آگ کو پھیلنے سے بچا لیا تاہم کسی جانی نقصان کی اطلاع نہیں ملی ہے۔
اتوار بازار میں آتشزگی سے کپڑے کے کئی اسٹالز جل کر راکھ ہوگئے، فائر بریگیڈ کی 16 گاڑیاں اور ایک درجن سے زائد فائر فائٹرز نے 2 گھنٹے کی جدوجہد کے بعد آگ پر قابو پالیا۔
واقعے کی اطلاع ملتے ہیں ڈپٹی کمشنر اسلام آباد، اسسٹنٹ کمشنر اور دیگر افسران بھی جائے وقوعہ پر پہنچ گئے۔ وفاقی وزیر داخلہ رانا ثناء اللہ نے آتشزدگی کے واقعے کا نوٹس لے کر ضلعی انتظامیہ سے رپورٹ طلب کرلی ہے۔
