The news is by your side.

Advertisement

اسلام آباد میں پولیس اہلکاروں پر فائرنگ، 2 اہلکار شہید

اسلام آباد میں نامعلوم ملزمان نے فائرنگ کرکے 2 پولیس اہلکاروں کو شہید کردیا۔

اے آر وائی نیوز کے مطابق اسلام آباد آئی جے پرنسپل روڈ کے قریب مسلح ملزمان نے ایگل اسکواڈ کے اہلکاروں پر اندھا دھند فائرنگ کردی جس کے نتیجے میں 2 اہلکار شہید ہوگئے۔

پولیس کے مطابق شہید پولیس اہلکاروں میں بشیر اور اشتیاق شامل ہیں۔

ذرائع کا کہنا ہے کہ واقعہ تھانہ شمس کالونی کی حدود میں پیش آیا، اہلکار ایگل فورس کا حصہ تھے اور موٹر سائیکل پر علاقے کی پیٹرولنگ پر مامور تھے۔

ایس پی فدا ستی کے مطابق دونوں اہل کاروں کی لاشوں کو ضابطے کی کارروائی کے لیے اسپتال منتقل کر دیا گیا ہے جبکہ قانون نافذ کرنے والے اہل کاروں نے علاقے کی ناکہ بندی کرکے ملزمان کی تلاش شروع کردی۔

وزیر داخلہ شیخ رشید نے پولیس اہلکاروں پر فائرنگ کا نوٹس لیتے ہوئے آئی جی اسلام آباد سے واقعے کی رپورٹ طلب کرلی۔

شیخ رشید نے شہید اہلکاروں کے لواحقین سے اظہار ہمدردی کرتے ہوئے کہا کہ فائرنگ کے واقعے میں ملوث ملزمان کو جلد گرفتار کیا جائے۔

مزید پڑھیں: اسلام آباد میں پولیس پر فائرنگ، اہلکار شہید، سب انسپکٹر سمیت 2 زخمی

واضح رہے کہ اس سے قبل بھی ناکے اور پیٹرولنگ پر موجود پولیس اہلکاروں کو ملزمان کی جانب سے متعدد بار حملوں میں نشانہ بنایا گیا تھا۔

قبل ازیں رواں سال مارچ میں کنٹینرچوک میں پولیس وین پر فائرنگ کے نتیجے میں اہلکار قاسم شہید ہوگیا تھا، جب کہ فائرنگ سے 3 اہلکار زخمی ہوئے تھے۔

واقعہ سیکٹر جی 13 میں اس وقت پیش آیا تھا جب ایک سب انسپکٹر اور 2 پولیس کانسٹیبل معمول کی چیکنگ پر تھے کہ اہلکاروں نے اس دوران موٹرسائیکل سواروں کو روکا جس پر موٹرسائیکل پر سوار دو ملزمان نے فائرنگ کردی تھی۔

Comments

یہ بھی پڑھیں