اسلام آباد: ہائیکورٹ نے اسلام آباد میں ٹی اسٹالز اور ٹک شاپس کی نیلامی روک دی۔
تفصیلات کے مطابق اسلام آباد میں ٹی اسٹالز اور ٹک شاپس کی نیلامی کے خلاف انجمن تاجران کی درخواست پر بڑی پیش رفت ہوئی ہے، اسلام آباد ہائیکورٹ نے میٹرو پولیٹین کارپوریشن کو ٹی اسٹالز اور ٹک شاپس کی نیلامی سے روک دیا۔
عدالت نے انجمن تاجران کی درخواست پر حکم امتناعی جاری کر دیا، کیس کی سماعت جسٹس میاں گل حسن اورنگزیب عالمگیر نے کی، انھوں نے ڈائریکٹر سی ڈی اے کی گزشتہ سماعت پر دیے بیان میں ترمیم کی استدعا مسترد کی۔
میٹرو پولیٹین کارپوریشن نے اسلام آباد میں 1807 ٹی اسٹالز اور ٹک شاپس نیلامی کا اشتہار دے رکھا ہے، جس پر انجمن تاجران نے نیلامی کو عدالت میں چیلنج کر دیا تھا، کیس کی سماعت کے لیے صدر انجمن تاجران اسلام آباد اجمل بلوچ اپنے وکلا کے ہمراہ عدالت میں پیش ہوئے تھے۔
وکیل درخواست گزار نے کہا کہ اسلام آباد میں ٹی اسٹالز اور ٹک شاپس کی نیلامی ماسٹر پلان کی خلاف ورزی ہے۔ سماعت کے بعد عدالت نے انجمن تاجران کی درخواست پر حکم امتناعی جاری کرتے ہوئے سماعت غیر معینہ مدت تک ملتوی کر دی۔
