The news is by your side.

Advertisement

سی ڈی اے سیکٹرز متاثرین، اسلام آباد ہائیکورٹ نے فیصلہ جاری کر دیا

اسلام آباد: ہائی کورٹ نے اسلام آباد میں کیپٹل ڈیولپمنٹ اتھارٹی (سی ڈی اے) کے سیکٹرز کی تعمیر کی وجہ سے متاثر ہونے والے شہریوں کو معاضوں کی ادائیگی کا حکم جاری کر دیا ہے۔

تفصیلات کے مطابق اسلام آباد ہائی کورٹ کے جسٹس اطہر من اللہ نے تحریری فیصلہ جاری کرتے ہوئے سی ڈی اے کے سیکٹرز کی تعمیر سے متاثرین کو معاوضوں کی ادائیگی کا حکم دے دیا ہے۔

اس سلسلے میں 35 مختلف درخواستوں پر 65 صفحات پر مشتمل تفصیلی فیصلہ جاری کیا گیا ہے۔

عدالت نے حکومت کو زمین حاصل کرنے کے لیے پالیسی بنانے کا بھی حکم دے دیا ہے، ہائی کورٹ نے یہ حکم بھی دیا کہ متاثرین کے ساتھ جو معاہدہ کیا گیا تھا اس پر عمل درآمد کیا جائے۔

عدالتی فیصلے میں کہا گیا ہے کہ متاثرین کو جائیداد کا معاوضہ فراہم کرنا سی ڈی اے کی ذمہ داری ہے، معاوضہ ادا کرنے میں تاخیر کے ذمہ داروں کے خلاف کارروائی ہوگی۔

عدالت نے حکم دیا کہ سیکریٹری داخلہ یہ عدالتی فیصلہ 2 ہفتے میں وزیر اعظم اور کابینہ کے سامنے رکھے۔ عدالت نے رجسٹرار ہائی کورٹ کو فیصلے کی کاپی سیکریٹری داخلہ کو ارسال کرنے کی ہدایت کی۔

فیصلے میں کہا گیا ہے کہ حکومت تحقیقات کر کے متاثرین کو پلاٹ نہ دینے والے افسران کا تعین کرے، 2010 میں طے کردہ معاوضہ اب قابل عمل نہیں رہا ہے، اس لیے نئی مارکیٹ ویلیو کے مطابق ادائیگیاں کی جائیں۔

تحریری فیصلے میں کہا گیا کہ اس عدالت کو بتایا گیا کہ زیادہ تر حاصل کردہ زمین کا ریکارڈ نیب لے گیا تھا، اور پھر غائب ہی ہوگیا، اور اس سلسلے میں سنگین نوعیت کی بے ضابطگیاں ہوئیں۔

عدالت نے قرار دیا کہ سی ڈی اے نے متاثرین کو بنیادی حق سے محروم کر کے اختیارات کا غلط استعمال کیا، ذمہ داروں کے خلاف کارروائی ہوگی، اور متاثرین کو معاوضوں کی ادائیگی کی جائے۔

Comments

یہ بھی پڑھیں