The news is by your side.

Advertisement

جنگلات میں لگی آگ پر قابو پانے کیلئے پاک فوج کا ریسکیو آپریشن جاری

راولپنڈی: پاک فوج کا صوبہ بلوچستان کے علاقہ ضلع شیرانی کے قریب جنگلات میں لگی آگ پر قابو پانے کیلئے ریسکیو آپریشن جاری ہے۔

پاک فوج کے شعبہ تعلقات عامہ (آئی ایس پی آر) کے مطابق پاک فوج کی جانب سے صوبہ بلوچستان کے ضلع شیرانی کے قریب جنگل میں لگی آگ پر قابو پانے کیلئے ریسکیو آپریشن جاری ہے، پاک فوج پی ڈی ایم اے اور این ڈی ایم اے کے ساتھ آگ بجھانے میں مصروف ہیں۔

آئی ایس پی آر کے مطابق جنگلات میں آگ 18 مئی کو 10 ہزار فٹ بلند چوٹیوں پر لگی، تاہم شدید گرم موسم اور ہواؤں کے باعث آگ دور تک پھیل گئی، فوج اور ایف سی بلوچستان زیادہ سے زیادہ مدد فراہم کررہے ہیں، قریب ترین دیہات آگ سے 10 کلومیٹر کے فاصلے پر ہیں، 10 خاندانوں کو محفوظ مقامات پر منتقل کردیا گیا ہے ۔

انہوں نے کہا کہ کوئٹہ کور ہیڈ کوارٹر پی ڈی ایم اے کے ساتھ مکمل رابطے میں ہے، ایف سی کا ایک ونگ، 2 آرمی ہیلی کاپٹرز آگ بجھانے میں مصروف ہیں، ایک ہیلی کاپٹر سے آگ پر پانی گرایا جارہا ہے جبکہ دوسرے ہیلی کاپٹر سے فائر بالز اور کیمیکلز پھینکے جارہے ہیں۔

آئی ایس پی آر کا مزید کہنا ہے کہ 400 فائربالز، 200 فائر سوٹس اور دیگر آلات بھی این ڈی ایم اے کو دیے گئے ہیں، جبکہ فوج ضروری ریلیف آلات لاہور سے ژوب منتقل کررہی ہے۔

Comments

یہ بھی پڑھیں