راولپنڈی: افواج پاکستان نے بھارتی سیکیورٹی اسٹیلشمنٹ کی ہرزہ سرائی پر سخت ردعمل دیتے ہوئے کہا کہ بھارت نے نیا ڈرامہ کرنے کی کوشش کی تو پاکستان کا ردعمل تباہ ہوگا۔
پاک فوج کے شعبہ تعلقات عامہ (آئی ایس پی آر) کا کہنا ہے کہ بھارتی اسٹیبلشمنٹ کے بیانات غیر ذمہ دارانہ ہیں، متنہ کرتے ہیں اگر کوئی ایڈونچر کیا گیا تو بھرپور جواب دیں گے۔
آئی ایس پی آر کا کہنا ہے کہ جنوبی ایشیا میں امن و استحکام کے لیے ہرزہ سرائی کے سنگین نتائج برآمد ہوسکتے ہیں، بھارت کئی دہائیوں سے مظلومیت کا کارڈ کھیل رہا ہے۔
ترجمان پاک فوج کا کہنا ہے کہ بھارت مسلسل دنیا میں پاکستان کا منفی تشخص پیش کررہا ہے، بھارت جنوبی ایشیا میں خود تشدد اور دہشت گردی کو فروغ دے رہا ہے۔
آئی ایس پی آر کا کہنا ہے کہ بھارت کا بیانیہ موثر انداز میں جھٹلایا جاچکا ہے، دنیا کراس بارڈر دہشت گردی پر بھارت کا مکروہ چہرہ دیکھ چکی ہے۔
یہ پڑھیں: بھارتی ایئر چیف کا پاکستانی ایف 16 طیارے گرانے کا مضحکہ خیز دعویٰ
ترجمان پاک فوج کا مزید کہنا ہے کہ بھارت خطے میں عدم استحکام کا مرکز ہے، بھارت اپنے تباہ شدہ لڑاکا طیاروں کو بھول گیا۔
آئی ایس پی آر کا کہنا ہے کہ دنیا بھارت کو خطے کے عدم استحکام کے مرکز کے طور پر تسلیم کرچکی ہے، رواں سال بھارتی جارحیت نے دو ایٹمی طاقتوں کو جنگ کے دہانے پر لا کھڑا کیا تھا، بھارت کو طیاروں کے ملبے اور طویل مار کرنے والے ہتھیار یاد رکھنے چاہئیں۔
پاک فوج ترجمان کا کہنا ہے کہ بھارت اجتماعی بھول کا شکار ہوکر ایک اور تصادم کی طرف بڑھ رہا ہے، بھارتی وزیر دفاع، آرمی و ایئر چیفس کے بیانات خطے کو خطرات سے دوچار کرسکتے ہیں، مستقبل کا تصادم خطے میں تباہ کن اور قیامت خیز نتائج لاسکتا ہے۔
آئی ایس پی آر کا کہنا ہے کہ نئی حرکت کی گئی تو بھارت کے جغرافیائی تحفظ کا وہم اس بار توڑ دیا جائے گا، پاکستان دشمن کے دور دراز حصوں کو بھی نشانہ بنانے کی صلاحیت رکھتا ہے، بھارت کو یاد رکھنا چاہیے کہ پاکستان کو مٹانے کی بات ہوئی تو مٹاؤ دونوں کا ہوگا۔
لئیق الرحمن دفاعی اور عسکری امور سے متعلق خبروں کے لئے اے آروائی نیوز کے نمائندہ خصوصی ہیں