غزہ: صیہونی ریاست اسرائیل نے بربریت کی انتہا کردی، فورسز نے فائرنگ کرکے 16 سالہ فلسطینی طالبہ کو شہید کردیا۔
تفصیلات کے مطابق 16 سالہ طالبہ ’سما زہیر مبارک‘ اسکول کی طالبہ تھی جسے اسرائیلی فوج نے فلسطینی شہر رم اللہ میں قائم چیک پوسٹ پر فائرنگ کرکے موت کے گھاٹ اتار دیا۔
غیر ملکی خبر رساں ادارے کا کہنا ہے کہ الزعیم نامی سیکیورٹی چیک پوسٹ پر پیدل چلتی طالبہ پر اسرائیلی فوج نے اندھا دھن فائرنگ کردی جس کے باعث وہ موقع پر ہی جاں بحق ہوگئی۔
دوسری جانب اسرائیلی فوج نے ہرزہ سرائی کرتے ہوئے کہا کہ سما زہیر نے چیک پوسٹ پر موجود فوجی اہلکاروں پر چاقو سے حملے کی کوشش کی۔
انہوں نے ڈھاٹی کا مظاہر کرتے ہوئے مزید کہا کہ بچی کو حملہ کرتا دیکھ کر اہکاروں نے فائرنگ کی اور وہ ہلاک ہوگئی۔
اسرائیلی فورسز کی نہتے فلسطینیوں پر فائرنگ، ایک خاتون شہید، 14 زخمی
خیال رہے کہ گذشتہ دنوں صیہونی آباد کاروں نے رم اللہ میں اسرائیلی فورسز کے ہمراہ حملہ کرکے ایک فلسطینی کو شہید جبکہ درجنوں افراد کو زخمی کردیا تھا۔
گذشتہ جمعے اسرائیلی فورسز نے مظاہرے کے دوران نہتے فلسطینیوں پر فائرنگ کرکے دو افراد کو شہید کردیا تھا۔
یاد رہے کہ غیور فلسطینیوں نے 30 مارچ 2018 کو ’تحریک حق واپسی‘ کے تحت غزہ کی پٹی پر احتجاجی مظاہروں کا آغاز کیا تھا، فلسطینی شہری ہر جمعے اسرائیلی سرحد پر جمع ہوکر غزہ کی صیہونی مظالم اور غزہ کی ناکہ بندی کے خلاف مظاہرہ کرتے ہیں۔
