غزہ: فلسطین میں اسرائیلی جارحیت تھم نہ سکی، لڑاکا طیاروں نے ایک بار پھر فضائی بمباری شروع کردی۔
تفصیلات کے مطابق اسرائیلی حکام نے کہا ہے کہ فضائی بمباری حماس کے ٹھکانوں پر کی گئی، جنوبی غزہ کے علاقے خان یونس میں تین حملوں میں بحری بیس کو نقصان پہنچا اور سات مقام پر آگ لگ گئی۔
غیر ملکی خبر رساں ادارے کے مطابق اسرائیلی فوج حماس کے ٹھکانوں پر فضائی حملے کا بہانہ بنا کر نہتے اور معصوم فلسطینیوں کو نشانہ بناتی ہے۔
اسرائیل کے لڑاکا طیاروں نے دوبار غزہ میں حماس کے متعدد ٹھکانوں کو نشانہ بنایا ہے۔ حملے میں کسی کے زخمی ہونے کی اطلاع نہیں ہے۔
حملے میں حماس کے بحری بیس پر بھی بم گرائے گئے، مقبوضہ علاقے میں آتشی غباروں کی وجہ سے سات مقامات پر آگ لگ گئی، اسرائیل نے غزہ کی بحری حدود بڑھانے کا فیصلہ واپس لیتے ہوئے اسے ماہی گیری کے لئے مکمل طور پر بند کر دیا۔
اس سے قبل گذشتہ سال اگست میں صیہونی افواج کی غزہ میں واقع عمارت پر فضائی بمباری کے نتیجے میں 18 فلسطینی زخمی ہوگئے تھے، متاثرہ عمارت میں ثقافتی مرکز اور دفاتر قائم تھے۔
اسرائیلی فورسز کا غزہ میں ایک اور فضائی حملہ، 18 فلسطینی زخمی
خیال رہے کہ گذشتہ سال ہی اسرائیل کے جیٹ طیاروں نے مقبوضہ فلسطین کے شہر غزہ کی پٹی پر درجنوں فضائی حملے کیے تھے جس کے نتیجے میں حاملہ خاتون اور اس ایک سالہ بیٹی سمیت تین افراد شہید ہوگئے تھے۔
