غزہ: قابض اسرائیلی فوج نے فلسطین کے علاقے غزہ کی پٹی میں ایک پرامن احتجاجی ریلی پر فائرنگ کردی جس کے باعث 75 فلسطینی زخمی ہوگئے۔
تفصیلات کے مطابق قابض فورسز نے مظاہرین پر مشین گنوں سے فائرنگ کی ہے جس کے نتیجے متعدد شہری زخمی ہوگئے، زخمیوں میں بعض کی حالات نازک ہے۔
غیرملکی خبررسا ں ادارے کے مطابق ایک مقامی فیلڈ آبزرور نے بتایا کہ قابض فوج نے جنوبی غزہ میں مظاہرین پر مشین گنوں، آنسوگیس کی شیلگ اور دھاتی گولیوں کا استعمال کیا جس کے نتیجے میں دو خواتین اور 18 بچوں سمیت کم سے کم 75 فلسطینی زخمی ہوگئے۔
ذرائع کے مطابق اسرائیلی فوجیوں نے پر امن فلسیطنیوں پر مشین گنوں سے شیلنگ کی جس کے نتیجے میں متعدد فلسطینی زخمی ہوگئے۔ زخمیوں میں سے بعض کو تشویشناک حالت میں اسپتال منتقل کیا گیا ہے۔
قابض اسرائیلی فوج نے ظلم کی انتہا کردی ہے، نہتے فلسطینیوں کے خلاف زمینی کارروائیوں کے بعد اب فضائی حملوں میں بھی اضافہ کردیا۔
غزہ میں اسرائیلی فوج کا فضائی حملہ، دو فلسطینی شہید
یاد رہے کہ گذشتہ دنوں غزہ پٹی میں اسرائیلی فوج کی شدید بمباری کے نتیجے میں دو فلسطینی شہید جبکہ متعدد زخمی ہوگئے تھے۔
دوسری جانب فلسطین میں قیام امن کے لیے سیاسی کوششیں بھی جاری ہیں، حال ہی میں جرمن چانسلر انجیلا مرکل اور فلسطینی صدر نے ملاقات کی تھی جس میں خطے کی تازہ صورت حال سمیت سنگین صورتحال کے خاتمے پر بھی تبادلہ خیال ہوا۔
