چین کے دارالحکومت بیجنگ میں نامعلوم شخص نے اسرائیل کے سفارتی اہلکار کو قاتلانہ حملے میں شدید زخمی کر دیا۔
غیر ملکی میڈیا کی رپورٹس کے مطابق اسرائیلی وزارت خارجہ اور سفارت خانے نے حملے کی تصدیق کی۔ چاقو حملے میں زخمی اہلکار کو اسپتال منتقل کر دیا گیا جہاں وہ زیرِ علاج ہے۔
حملے کا مقصد معلوم نہیں ہو سکا اور نہ ہی اب تک کسی گروہ نے اس کی ذمہ دارے قبول کی۔ حملے کی تحقیقات کا آغاز کر دیا گیا۔
حملہ ایک ایسے وقت میں کیا گیا جب اسرائیل اور فلسطینی مزاحمتی تنظیم حماس کے درمیان جنگ جاری ہے۔ اہلکار پر قاتلانہ حملے سے دونوں ممالک کے تعلقات کشیدہ ہو سکتے ہیں۔ اسرائیل پہلے ہی چین سے حماس کے حملوں کی مذمت نہ کرنے پر سخت مایوس ہے۔
چند روز قبل مصر کے شہر اسکندریہ میں پولیس اہلکار نے دو اسرائیلی سیاحوں کو فائرنگ کر کے موت کے گھاٹ اتار دیا تھا۔ حملے میں ایک مصری شہری بھی ہلاک ہوا تھا۔
